مبینہ گھریلو تشدد کا شکار فرانسیسی خاتون اور چار بچوں خیبر سے بازیاب

پشاور: ضلع خیبر میں پولیس نے مبینہ گھریلو تشدد کی اطلاعات پر کارروائی کرتے ہوئے تحصیل باڑہ سے ایک فرانسیسی خاتون اور اس کے چار بچوں کو بازیاب کرا لیا۔
پولیس حکام کے مطابق خاتون کی شناخت سلوا یاسمین کے نام سے ہوئی ہے، جسے علاقے میں کیے گئے ایک چھاپے کے دوران تحویل میں لیا گیا۔ ابتدائی تحقیقات سے ظاہر ہوتا ہے کہ خاتون ممکنہ طور پر بدسلوکی اور گھریلو تشدد کا شکار رہی ہے، جس پر حکام نے فوری کارروائی کی۔
پولیس کے مطابق فرانسیسی شہری سلوا یاسمین نے ایک پاکستانی شہری سے شادی کر رکھی ہے اور وہ گزشتہ کئی برسوں سے تحصیل باڑہ میں مقیم ہے۔
مقامی ذرائع کا کہنا ہے کہ یاسمین 2014 سے علاقے میں رہائش پذیر ہے۔ مقامی رہائشی میاں سعید کے مطابق وہ ایک دہائی سے زائد عرصے سے باڑہ میں مقیم ہے۔
کارروائی کے بعد خاتون اور اس کے چار بچوں کو تحفظ اور ضروری معاونت کی فراہمی کے لیے پشاور کے وومن پولیس اسٹیشن منتقل کر دیا گیا، جہاں انہیں قانونی اور سماجی مدد بھی فراہم کی جا رہی ہے۔
پولیس نے واقعے کی باقاعدہ تحقیقات شروع کر دی ہیں اور کہا ہے کہ انکوائری مکمل ہونے کے بعد نتائج کی روشنی میں مزید قانونی کارروائی عمل میں لائی جائے گی۔