تاجروں کو ہراساں کرنے والا جعلی مجسٹریٹ قانون کی گرفت میں

نیوز ڈیسک
اسلام آباد: اسلام آباد کی ضلعی انتظامیہ نے خود کو مجسٹریٹ ٹیم کا رکن ظاہر کرکے تاجروں کے خلاف غیرقانونی کارروائیاں کرنے والے ایک شخص کو گرفتار کر لیا، جبکہ اس کے ساتھیوں کے خلاف بھی مقدمہ درج کر کے تحقیقات کا آغاز کر دیا گیا۔
ضلعی انتظامیہ کے مطابق تاجر برادری کی جانب سے شکایات موصول ہونے پر ڈپٹی کمشنر اسلام آباد کی ہدایت پر ایک خفیہ ٹیم تشکیل دی گئی، جس نے کارروائی کرتے ہوئے ملزم کو اس وقت گرفتار کیا جب وہ مبینہ طور پر ضلعی انتظامیہ کا نام استعمال کرتے ہوئے غیر مجاز کارروائیاں کر رہا تھا۔
ایف آئی آر کے مطابق گرفتار ملزم کی شناخت اسامہ کے نام سے ہوئی ہے، جو اپنے دیگر ساتھیوں کے ساتھ مل کر سرکاری اختیارات کا جھوٹا تاثر دے کر کارروائیاں کر رہا تھا۔ حکام کا کہنا ہے کہ ملزمان کے پاس کسی بھی قسم کی مجسٹریٹ یا ضلعی انتظامیہ کی کارروائی کا قانونی اختیار موجود نہیں تھا۔
گرفتاری کے بعد ملزم اور اس کے ساتھیوں کے خلاف تھانہ انڈسٹریل ایریا میں مقدمہ درج کر لیا گیا ہے، جبکہ پولیس اس بات کی تحقیقات کر رہی ہے کہ اس گروہ میں مزید کتنے افراد شامل تھے اور وہ کب سے ایسی سرگرمیوں میں ملوث تھے۔
ڈپٹی کمشنر اسلام آباد نے تاجروں اور شہریوں سے اپیل کی ہے کہ اگر کوئی شخص خود کو ضلعی انتظامیہ یا مجسٹریٹ ٹیم کا رکن ظاہر کرے تو اس کی فوری اطلاع متعلقہ حکام کو دیں۔
انہوں نے واضح کیا کہ ضلعی انتظامیہ کا نام استعمال کرتے ہوئے تاجروں یا شہریوں کو ہراساں کرنے والوں کے خلاف بلاامتیاز اور سخت قانونی کارروائی کی جائے گی۔
ڈپٹی کمشنر کا کہنا تھا کہ ضلعی انتظامیہ میں داخلی احتساب کا مؤثر نظام موجود ہے اور اختیارات سے تجاوز یا ضابطوں کی خلاف ورزی کرنے والے اہلکاروں کے خلاف بھی سخت محکمانہ اور قانونی کارروائی عمل میں لائی جاتی ہے۔
انہوں نے کہا کہ انتظامیہ اس بات کے لیے پرعزم ہے کہ تمام سرکاری کارروائیاں صرف مجاز اہلکار قانون کے مطابق انجام دیں، جبکہ شہری کسی بھی مشتبہ سرگرمی کی فوری اطلاع دے کر قانون نافذ کرنے والے اداروں سے تعاون کریں۔