بلوچستان کے 13 اضلاع میں بارش اور تیز ہواؤں کا امکان، پی ڈی ایم اے الرٹ

اسلام آباد

پراونشل ڈیزاسٹر مینجمنٹ اتھارٹی (پی ڈی ایم اے) بلوچستان نے صوبے کے بالائی اور وسطی اضلاع میں بارش، گرج چمک اور تیز ہواؤں کے پیش نظر موسم کا الرٹ جاری کر دیا ہے۔
پی ڈی ایم اے کے مطابق پاکستان محکمہ موسمیات (پی ایم ڈی) نے پیش گوئی کی ہے کہ 7 جولائی کی رات سے 8 جولائی تک مغربی ہواؤں کا ایک سلسلہ خلیجِ بنگال سے آنے والی مرطوب ہواؤں کے ساتھ مل کر بلوچستان کے مختلف علاقوں میں غیر مستحکم موسمی صورتحال پیدا کرے گا۔
الرٹ کے مطابق ژوب، شیرانی، کوہلو، نصیر آباد، دکی، ہرنائی، لورالائی، سبی، بارکھان، موسیٰ خیل، خضدار، ڈیرہ بگٹی اور ملحقہ علاقوں میں بارش، گرج چمک اور تیز ہواؤں کا امکان ہے۔
پی ڈی ایم اے نے خبردار کیا ہے کہ تیز ہوائیں کمزور عمارتوں، بجلی کے کھمبوں، اشتہاری بورڈز اور سولر پینلز کو نقصان پہنچا سکتی ہیں، جبکہ بعض مقامات پر آسمانی بجلی گرنے کا بھی خدشہ ہے۔
اتھارٹی نے تمام ڈپٹی کمشنرز، ضلعی ڈیزاسٹر مینجمنٹ اتھارٹیز (ڈی ڈی ایم ایز) اور متعلقہ اداروں کو ہائی الرٹ رہنے کی ہدایت کرتے ہوئے کہا ہے کہ ہنگامی امدادی ٹیمیں، مشینری اور ضروری آلات ہر وقت تیار رکھے جائیں تاکہ کسی بھی ناخوشگوار صورتحال میں فوری کارروائی کی جا سکے۔
پی ڈی ایم اے نے کسانوں کو مشورہ دیا ہے کہ وہ موسمی پیش گوئی کو مدنظر رکھتے ہوئے اپنی زرعی سرگرمیوں کی منصوبہ بندی کریں، جبکہ شہری غیر ضروری سفر سے گریز کریں اور خراب موسم کے دوران کمزور عمارتوں، درختوں، بجلی کی تنصیبات اور دیگر خطرناک مقامات سے دور رہیں۔
ضلعی انتظامیہ کو ہدایت کی گئی ہے کہ وہ موسمی صورتحال پر مسلسل نظر رکھے، متعلقہ اداروں کے ساتھ مؤثر رابطہ برقرار رکھے، بروقت عوامی آگاہی یقینی بنائے اور صوبائی ایمرجنسی آپریشن سینٹر (پی ای او سی) کو صورتحال سے باقاعدگی سے آگاہ کرتی رہے۔
پی ڈی ایم اے نے واضح کیا ہے کہ ادارہ کسی بھی موسمی ہنگامی صورتحال سے نمٹنے کے لیے مکمل طور پر تیار ہے اور عوام سے اپیل کی ہے کہ وہ محکمہ موسمیات اور پی ڈی ایم اے کی جانب سے جاری کردہ سرکاری ہدایات اور وارننگز پر عمل کریں۔