اسلام آباد (ویب ڈیسک): وزیر اعظم شہباز شریف نے کہا ہے کہ جنگ بندی میں توسیع ایک مثبت اور اہم قدم ہے جو خطے میں کشیدگی کم کرنے اور سفارتی کوششوں کو آگے بڑھانے میں مدد دے گا۔
وزیر اعظم نے اپنے بیان میں ڈونلڈ ٹرمپ کی جانب سے جنگ بندی میں توسیع کی درخواست قبول کرنے پر شکریہ ادا کیا۔ انہوں نے کہا کہ پاکستان ہمیشہ سے تنازعات کے پرامن حل اور مذاکرات کے عمل کی حمایت کرتا آیا ہے۔
انہوں نے مزید کہا کہ جنگ بندی میں توسیع خطے میں امن کے لیے ایک اہم پیش رفت ہے، جو جاری مذاکرات کو مزید مضبوط بنائے گی۔
وزیر اعظم شہباز شریف نے فیلڈ مارشل سید عاصم منیر کی جانب سے بھی صدر ٹرمپ کا شکریہ ادا کیا اور کہا کہ پاکستان خطے میں امن کے لیے اپنی سفارتی کوششیں جاری رکھے گا۔
انہوں نے امید ظاہر کی کہ اسلام آباد میں ہونے والے مذاکرات کا دوسرا دور ایک جامع امن معاہدے تک پہنچنے میں مدد دے گا، جو خطے میں پائیدار امن کے قیام میں اہم کردار ادا کرے گا۔
وزیر اعظم نے فریقین پر زور دیا کہ وہ جنگ بندی کا مکمل احترام کریں اور دیرپا امن کے لیے مذاکرات کا عمل جاری رکھیں۔
