اسلام آباد: وفاقی حکومت نے ملک میں آبادی میں تیزی سے اضافے پر قابو پانے اور قومی سطح پر مربوط حکمت عملی وضع کرنے کے لیے نیشنل پاپولیشن کونسل (قومی آبادی کونسل) قائم کر دی ہے۔
سرکاری نوٹیفکیشن کے مطابق وزیراعظم شہباز شریف 16 رکنی کونسل کے چیئرمین ہوں گے، جبکہ فیلڈ مارشل سید عاصم منیر کو بھی کونسل کا رکن مقرر کیا گیا ہے۔
کونسل میں چاروں صوبوں کے وزرائے اعلیٰ، آزاد جموں و کشمیر کے وزیراعظم اور گلگت بلتستان کے وزیراعلیٰ بھی شامل ہیں، تاکہ آبادی سے متعلق پالیسیوں پر وفاق اور صوبوں کے درمیان مؤثر رابطہ اور تعاون یقینی بنایا جا سکے۔
وفاقی کابینہ کی جانب سے وزیر خزانہ، وزیر منصوبہ بندی، وزیر قومی صحت، وزیر تعلیم، وزیر قانون و انصاف، وزیر اطلاعات و نشریات اور وزیر مذہبی امور بھی کونسل کے ارکان ہوں گے۔
نوٹیفکیشن کے مطابق قومی آبادی کونسل کا بنیادی مقصد آبادی میں تیزی سے اضافے سے نمٹنے کے لیے ایک جامع اور مؤثر پالیسی فریم ورک تیار کرنا اور آبادی کے انتظام سے متعلق اقدامات پر وفاقی اور صوبائی حکومتوں کے درمیان قریبی ہم آہنگی کو فروغ دینا ہے۔
حکومت کے مطابق کونسل خاندانی منصوبہ بندی کے فروغ اور آبادی سے متعلق مسائل پر عوامی شعور اجاگر کرنے کے لیے مذہبی رہنماؤں، سول سوسائٹی کی تنظیموں اور نجی شعبے کو بھی قومی آگاہی مہم میں شریک کرے گی۔
نوٹیفکیشن میں کہا گیا ہے کہ کونسل وقتاً فوقتاً قومی آبادی پالیسی پر عمل درآمد کا جائزہ لے گی، متعلقہ اداروں کے درمیان تعاون کو مزید مؤثر بنانے کے لیے سفارشات پیش کرے گی اور آبادی کے انتظام سے متعلق قومی اہداف کے حصول کے لیے اقدامات کی نگرانی کرے گی۔
