اسلام آباد (ویب ڈیسک): حکومت نے پیٹرولیم مصنوعات کی قیمتوں میں بڑا اضافہ کرتے ہوئے پیٹرول اور ہائی اسپیڈ ڈیزل کی قیمت میں 26 روپے 77 پیسے فی لیٹر اضافہ کر دیا ہے۔
جاری نوٹیفکیشن کے مطابق اضافے کے بعد پیٹرول کی نئی قیمت 393 روپے 35 پیسے فی لیٹر مقرر کی گئی ہے، جبکہ ہائی اسپیڈ ڈیزل 380 روپے 19 پیسے فی لیٹر ہو گیا ہے۔
نوٹیفکیشن کے مطابق نئی قیمتوں کا اطلاق آج رات 12 بجے سے ہوگا اور آئندہ ہفتے تک برقرار رہے گا۔
وفاقی وزیر پیٹرولیم Ali Pervaiz Malik کے مطابق علاقائی کشیدگی کے باعث عالمی منڈی میں تیل کی قیمتوں میں دوبارہ اضافہ ہو رہا ہے، جس کے سبب قیمتوں کے دباؤ اور عالمی شراکت داروں سے معاہدوں کے تحت یہ اقدام اٹھانا پڑا۔
انہوں نے کہا کہ حکومت نے جہاں تک ممکن ہوا پیٹرولیم مصنوعات کی قیمتوں میں اضافے کا بوجھ خود برداشت کیا، جبکہ امید ہے کہ علاقائی امن میں بہتری کے بعد عوام کو ریلیف فراہم کیا جا سکے گا۔
