لاہور (ویب ڈیسک): لاہور کے علاقے شاہدرہ میں ایک پولیس ملازم کی جانب سے اپنی ہی بہو کو مبینہ طور پر زیادتی کا نشانہ بنانے کا افسوسناک واقعہ سامنے آیا ہے، جس پر پولیس نے کارروائی کرتے ہوئے ملزم کو گرفتار کر لیا۔
تفصیلات کے مطابق شاہدرہ کے رہائشی اور اسپیشل برانچ میں کلریکل اسٹاف کے طور پر تعینات ملزم رمضان پر الزام ہے کہ وہ عرصہ دراز سے اپنی بہو کو مبینہ طور پر زیادتی کا نشانہ بنا رہا تھا۔
متاثرہ خاتون کے والدین کی درخواست پر پولیس نے فوری کارروائی کرتے ہوئے مقدمہ درج کیا اور ملزم کو حراست میں لے لیا۔
پولیس کے مطابق متاثرہ خاتون کی شادی پانچ سال قبل ملزم کے بیٹے سے ہوئی تھی اور وہ دو بچیوں کی ماں ہے۔ الزام ہے کہ ملزم اسے مسلسل بلیک میل کرتا رہا اور زبان کھولنے پر اس کے اہل خانہ کو جھوٹے مقدمات میں پھنسانے کی دھمکیاں دیتا تھا۔
پولیس حکام کا کہنا ہے کہ واقعے کی مکمل تحقیقات جاری ہیں اور ملزم کے خلاف قانون کے مطابق سخت کارروائی کی جائے گی تاکہ متاثرہ خاتون کو انصاف فراہم کیا جا سکے۔
