جے یو آئی رہنما راشد محمود سومرو کی تعزیت، سندھ میں تعلیمی اداروں اور خواتین کے تحفظ پر تشویش کا اظہار

**جمعیت علماءِ اسلام (ف) سندھ کے جنرل سیکرٹری راشد محمود سومرو ڈپٹی ڈاکٹر فہمیدہ لغاری کے گھر پہنچے اور ان کے اہل خانہ سے تعزیت کی۔

تعزیت کے بعد صحافیوں سے گفتگو کرتے ہوئے انہوں نے کہا کہ سندھ میں یونیورسٹیوں اور تعلیمی بورڈز کی صورتحال انتہائی خراب ہے اور اربوں روپے کی کرپشن میں افسران اور وزرا ملوث ہیں۔

انہوں نے کہا کہ فہمیدہ لغاری کیس کی تحقیقات پر اہل خانہ کو تحفظات ہیں، اس لیے ضروری ہے کہ تحقیقات کے ہر مرحلے کی رپورٹ متاثرہ خاندان کو فراہم کی جائے۔

راشد محمود سومرو نے کہا کہ کالجز اور یونیورسٹیوں میں زیرِ تعلیم بچیاں ہماری بیٹیاں ہیں، اگر کسی استاد، لیکچرار یا ڈاکٹر کی جانب سے ہراسانی کی جائے تو متاثرہ افراد خودکشی کرنے کے بجائے ان سے رابطہ کریں، انہیں ہر ممکن تحفظ فراہم کیا جائے گا۔

انہوں نے مزید کہا کہ سندھ میں خواتین غیر محفوظ ہیں۔ لاڑکانہ میں 4 سالہ بچی کے اغوا اور زیادتی کے بعد قتل، جبکہ خیرپور اور میرپورخاص میں بھی ایسے دلخراش واقعات پیش آ چکے ہیں۔

انہوں نے مطالبہ کیا کہ ان واقعات میں ملوث عناصر کو سخت اور عبرتناک سزا دی جائے تاکہ آئندہ ایسے جرائم کی روک تھام ممکن ہو سکے اور متاثرین کو انصاف مل سکے۔