کراچی
مون سون کا نیا اسپیل 31 جولائی سے پاکستان میں داخل ہونے کا امکان ہے، جس کے باعث کراچی سمیت ملک کے مختلف علاقوں میں بارشوں کی پیش گوئی کی گئی ہے۔ محکمہ موسمیات کے مطابق بندرگاہی شہر آئندہ 24 گھنٹوں کے دوران گرم اور مرطوب موسم کی لپیٹ میں رہے گا۔
پاکستان میٹرولوجیکل ڈیپارٹمنٹ (پی ایم ڈی) کے مطابق کراچی میں موسم جزوی طور پر ابر آلود رہنے کا امکان ہے، جبکہ بعض مقامات پر بوندا باندی بھی ہو سکتی ہے۔ شہر میں زیادہ سے زیادہ درجہ حرارت 33 سے 35 ڈگری سینٹی گریڈ کے درمیان رہنے کی توقع ہے، جبکہ گزشتہ 24 گھنٹوں کے دوران کم سے کم درجہ حرارت 28.5 ڈگری سینٹی گریڈ ریکارڈ کیا گیا۔
محکمہ موسمیات کے مطابق کراچی میں سمندری ہوائیں 18 کلومیٹر فی گھنٹہ کی رفتار سے چل رہی ہیں، جبکہ ہوا میں نمی کا تناسب 78 فیصد ریکارڈ کیا گیا ہے۔
دوسری جانب ماہرین موسمیات نے 29 جولائی سے 5 اگست تک ملک کے مختلف حصوں میں مون سون کے ایک نئے نظام کے اثر انداز ہونے کی پیش گوئی کی ہے۔ اس دوران سندھ، پنجاب، خیبرپختونخوا، اسلام آباد، آزاد کشمیر اور گلگت بلتستان میں بارشوں کا امکان ظاہر کیا گیا ہے۔
کراچی میں 31 جولائی سے 2 اگست کے دوران بارش متوقع ہے، جہاں بعض علاقوں میں ہلکی بارش جبکہ چند مقامات پر موسلادھار بارش کا امکان ہے۔
محکمہ موسمیات نے خبردار کیا ہے کہ مون سون کے نئے اسپیل کے باعث دریاؤں اور ندی نالوں میں پانی کی سطح بلند ہو سکتی ہے، جبکہ بعض علاقوں میں شہری سیلاب اور سیلابی صورتحال کا خطرہ بھی پیدا ہو سکتا ہے۔
خیبرپختونخوا پراونشل ڈیزاسٹر مینجمنٹ اتھارٹی (پی ڈی ایم اے) نے ضلعی انتظامیہ کو الرٹ رہنے اور ضروری احتیاطی اقدامات یقینی بنانے کی ہدایت کی ہے، کیونکہ مون سون ہواؤں کے ملک کے بالائی اور وسطی علاقوں پر اثر انداز ہونے کا امکان ہے۔
