امریکا میں امریکن ایئرلائنز کی ایک پرواز کے دوران مسافر کے لیپ ٹاپ میں اچانک آگ لگ گئی، جس کے نتیجے میں 4 مسافر زخمی ہوگئے۔
امریکی میڈیا کے مطابق واقعہ جمعے کے روز امریکن ایئرلائنز کی پرواز 2398 میں پیش آیا۔ پرواز اٹلانٹا سے ڈیلاس فورٹ ورتھ انٹرنیشنل ایئرپورٹ جا رہی تھی کہ طیارے کے پچھلے حصے میں کیبن کے اندر لیپ ٹاپ میں آگ بھڑک اٹھی۔
فضائی عملے نے فوری کارروائی کرتے ہوئے تھرمل کنٹینمنٹ بیگ کی مدد سے آگ پر قابو پالیا۔ پائلٹ نے فضائی ٹریفک کنٹرول کو اطلاع دی کہ طیارے کے پچھلے حصے میں آگ لگی ہے اور فلائٹ اٹینڈنٹس اسے بجھانے کی کوشش کر رہے ہیں۔
پائلٹ کے مطابق پرواز میں 133 افراد سوار تھے۔ واقعے کے بعد طیارے نے ڈیلاس فورٹ ورتھ انٹرنیشنل ایئرپورٹ پر بحفاظت لینڈ کیا۔
