آزاد کشمیر میں حکومت سازی کے معاملے پر سیاسی سرگرمیاں تیز ہوگئی ہیں۔ ذرائع کے مطابق پاکستان مسلم لیگ (ن) نے حکومت سازی کے لیے پاکستان پیپلز پارٹی سے بیک ڈور رابطے کیے ہیں۔ذرائع کا کہنا ہے کہ ن لیگ نے پیپلز پارٹی کو حکومت میں شامل ہونے کی دعوت دیتے ہوئے صدر آزاد کشمیر اور ڈپٹی اسپیکر سمیت اہم عہدے دینے کی پیشکش کی۔تاہم، اندرونی ذرائع کے مطابق پیپلز پارٹی نے ن لیگ کی پیشکش مسترد کرتے ہوئے اسمبلی میں اپوزیشن بینچوں پر بیٹھنے کا فیصلہ کیا ہے۔
پیپلز پارٹی نے آئندہ کے لیے وزیراعظم، اسپیکر اور ڈپٹی اسپیکر کے عہدوں پر اپنے امیدوار کھڑے کرنے کا فیصلہ بھی کیا ہے۔پی پی ذرائع کے مطابق ن لیگ سے کسی بھی ممکنہ بات چیت کو بعض حلقوں میں دوبارہ انتخابات کے معاملے سے مشروط کیا گیا ہے۔ پیپلز پارٹی کا مؤقف ہے کہ ن لیگ نے مظفرآباد مذاکرات میں طے پانے والے اور تسلیم شدہ نکات پر بھی عمل درآمد نہیں کیا۔
