کراچی کے علاقے منگھوپیر روڈ اور ملحقہ علاقوں میں بجلی کی عدم فراہمی کے خلاف احتجاج پر کے الیکٹرک کا ردعمل سامنے آگیا۔
کے الیکٹرک کے ترجمان کے مطابق منگھوپیر کے بعض فیڈرز پر بجلی کے نقصانات یعنی لائن لاسز کی شرح 80 فیصد سے بھی تجاوز کر گئی ہے۔ ترجمان کا کہنا ہے کہ ان نقصانات کی بڑی وجوہات بجلی چوری، کنڈا کلچر اور بجلی کے بلوں کی عدم ادائیگی ہیں۔
کے الیکٹرک کے مطابق علاقے میں لوڈشیڈنگ کا دورانیہ بجلی چوری اور لائن لاسز کی شرح سے منسلک ہے۔ کمپنی نے منگھوپیر کے رہائشیوں سے بجلی کے بل بروقت ادا کرنے کی اپیل کی ہے۔
ترجمان کے مطابق جن علاقوں میں لائن لاسز 70 سے 80 فیصد یا اس سے زیادہ ہوں، وہاں نظام کو محفوظ رکھنے کے لیے طویل اور اعلانیہ لوڈشیڈنگ کی جاتی ہے۔ تاہم، اس صورتحال کے باعث بل ادا کرنے والے صارفین بھی بجلی کی طویل بندش سے متاثر ہوتے ہیں۔
دوسری جانب کراچی کے مختلف علاقوں میں بجلی اور پانی کی عدم فراہمی کے خلاف احتجاج کا سلسلہ جاری ہے۔ مظاہروں کے باعث کئی مقامات پر ٹریفک کی روانی متاثر ہونے سے شہریوں کو مشکلات کا سامنا کرنا پڑ رہا ہے۔
