نیوز ڈیسک
اسلام آباد: وفاقی تحقیقاتی ادارے (ایف آئی اے) اینٹی ہیومن ٹریفکنگ سرکل اسلام آباد نے ویزا فراڈ کی شکایت پر فوری کارروائی کرتے ہوئے شہری سے ہتھیائی گئی 4 لاکھ روپے کی رقم انکوائری کے مرحلے میں ہی واپس کروا دی۔
ایف آئی اے اسلام آباد زون کے مطابق کارروائی انکوائری نمبر 522/2026 کے تحت کی گئی۔ شکایت کنندہ نے مؤقف اختیار کیا تھا کہ ملزم نے بیرون ملک ویزا دلوانے کا جھانسہ دے کر 2024 میں مختلف اوقات میں بینک اکاؤنٹ کے ذریعے مجموعی طور پر 4 لاکھ روپے وصول کیے۔
شکایت کے مطابق ملزم نے 9 سے 10 ماہ کے اندر ویزا فراہم کرنے کی یقین دہانی کرائی، تاہم تقریباً دو سال گزرنے کے باوجود نہ ویزا فراہم کیا گیا اور نہ ہی رقم واپس کی گئی۔ ملزم نے شکایت کنندہ کا پاسپورٹ بھی تقریباً دو سال سے اپنے قبضے میں رکھا ہوا تھا۔
شکایت کنندہ کے مطابق رقم کی واپسی کا مطالبہ کرنے پر ملزم ٹال مٹول سے کام لیتا رہا اور بعد ازاں جان سے مارنے کی دھمکیاں بھی دیں۔
ایف آئی اے اینٹی ہیومن ٹریفکنگ سرکل اسلام آباد نے شکایت موصول ہوتے ہی کارروائی شروع کی اور انکوائری کے دوران ملزم سے شکایت کنندہ کی مکمل رقم واپس کروا کر اس کے حوالے کر دی۔
شکایت کنندہ نے ایف آئی اے کی فوری اور مؤثر کارروائی پر اطمینان کا اظہار کرتے ہوئے ڈائریکٹر ایف آئی اے اسلام آباد زون، ڈپٹی ڈائریکٹر طارق مسعود اور انکوائری افسر اقصیٰ اقبال، سب انسپکٹر کا خصوصی شکریہ ادا کیا۔
ایف آئی اے اسلام آباد زون نے شہریوں کو یقین دہانی کرائی ہے کہ ویزا فراڈ سمیت اس نوعیت کی شکایات پر قانون کے مطابق سنجیدہ کارروائی جاری رکھی جائے گی اور شہریوں کے حقوق کے تحفظ کے لیے ادارہ متحرک ہے۔
