نیوز ڈیسک
اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر (NEOC) نے 25 سے 30 ستمبر کے دوران ملک کے بالائی علاقوں میں بارش، گرج چمک اور ممکنہ سیلاب کے حوالے سے الرٹ جاری کردیا۔
این ڈی ایم اے کے مطابق 25 اور 26 ستمبر کو مغربی موسمی نظام کی شدت میں اضافے کا امکان ہے، جس کے باعث بالائی خیبر پختونخوا، کشمیر، گلگت بلتستان اور اسلام آباد میں بارش اور گرج چمک کے ساتھ طوفان متوقع ہے۔
شدید بارش کے نتیجے میں پہاڑی علاقوں، موسمی ندی نالوں اور برساتی نالوں میں اچانک سیلاب کا خدشہ ہے، خصوصاً حساس اضلاع میں فلیش فلڈنگ کا خطرہ موجود رہے گا۔
گلگت بلتستان میں استور، سکردو، روندو، گانچھے اور شگر جبکہ آزاد کشمیر میں نیلم ویلی، حویلی، پونچھ اور سدھنوتی کو ممکنہ خطرے سے دوچار علاقوں میں شامل کیا گیا ہے۔
خیبر پختونخوا میں سوات، باجوڑ، دیر، کوہستان، کولائی پلاس، بٹگرام اور مانسہرہ سمیت متعدد علاقوں میں بھی فلیش فلڈنگ کا خدشہ ظاہر کیا گیا ہے۔
این ڈی ایم اے کے مطابق 30 ستمبر تک پوٹھوہار ریجن، پنجاب اور خیبر پختونخوا کے مختلف علاقوں میں گرج چمک کے ساتھ تیز بارش کا سلسلہ جاری رہ سکتا ہے، جبکہ بعض مقامات پر ژالہ باری کا بھی امکان ہے۔
شدید بارش کے باعث اسلام آباد، راولپنڈی، اٹک، چکوال، جہلم، مری، گلیات، میانوالی، خوشاب، بھکر، لیہ، سیالکوٹ، لاہور، گوجرانوالہ، گجرات، سرگودھا، فیصل آباد، اوکاڑہ، ساہیوال اور جھنگ میں شہری علاقوں میں اربن فلڈنگ کا خدشہ ظاہر کیا گیا ہے۔
خیبر پختونخوا کے دیر، سوات، بونیر، مالاکنڈ، شانگلہ، بٹگرام، کوہستان، مانسہرہ، ایبٹ آباد، ہری پور، نوشہرہ، صوابی، مردان، پشاور، کرم، ہنگو، کرک، بنوں، لکی مروت، ڈیرہ اسماعیل خان اور وزیرستان میں بھی شدید بارش کا امکان ہے۔
این ڈی ایم اے نے متعلقہ محکموں اور اداروں کو ممکنہ سیلاب اور دیگر موسمی ہنگامی صورتحال سے نمٹنے کے لیے پیشگی انتظامات مکمل رکھنے کی ہدایت کی ہے۔
حکام کو ممکنہ طور پر متاثرہ علاقوں میں امدادی ٹیموں اور ضروری وسائل کو اسٹینڈ بائی رکھنے، جبکہ بارش، ندی نالوں اور پانی کے بہاؤ کی مسلسل نگرانی یقینی بنانے کی ہدایت کی گئی ہے۔
این ڈی ایم اے نے شہریوں کو شدید بارش کے دوران برساتی ندی نالوں، پہاڑی سیلابی ریلوں اور پانی میں ڈوبی سڑکوں کو عبور کرنے سے گریز کرنے کی ہدایت کی ہے۔
نشینی اور دیگر خطرے سے دوچار علاقوں کے رہائشیوں کو بھی محتاط رہنے اور متعلقہ اداروں کی جانب سے جاری حفاظتی ہدایات پر عمل کرنے کا مشورہ دیا گیا ہے۔
این ڈی ایم اے نے عوام کو موسم کی تازہ اور مصدقہ صورتحال، ممکنہ خطرات اور حفاظتی رہنمائی کے لیے ’’پاک این ڈی ایم اے ڈیزاسٹر الرٹ‘‘ موبائل ایپ استعمال کرنے کی بھی ہدایت کی ہے۔
