پاکستان کی سری لنکا کے خلاف 227 رنز کی برتری

0

نیوز ڈیسک

راولپنڈی: پاکستان نے سری لنکا کے خلاف دوسرے ٹیسٹ میچ میں پہلی اننگز کے دوران 325 رنز بنا کر 227 رنز کی اہم برتری حاصل کرلی، جبکہ دوسرے روز قومی ٹیم کی اننگز 87.5 اوورز میں اختتام پذیر ہوئی۔

راولپنڈی میں جاری ٹیسٹ میں پاکستان نے سری لنکا کو پہلی اننگز میں محض 98 رنز پر ڈھیر کرنے کے بعد بیٹنگ میں بھی عمدہ کارکردگی دکھائی اور میچ پر اپنی گرفت مضبوط کرلی۔

گزشتہ روز ٹاس جیت کر پاکستان نے پہلے بولنگ کا فیصلہ کیا، جسے قومی فاسٹ بولرز نے درست ثابت کرتے ہوئے سری لنکن بیٹنگ لائن کو مشکلات میں ڈال دیا۔ سری لنکا کی ٹیم 35.3 اوورز میں 98 رنز پر آل آؤٹ ہوگئی، کپتان کوسل مینڈس 32 اور سونل دنوشا 21 رنز کے ساتھ نمایاں رہے، جبکہ دیگر بیٹرز ڈبل فیگر میں بھی داخل نہ ہوسکے۔

پاکستان کی جانب سے محمد عباس، رضاؤ اللہ اور عامر جمال نے تین، تین وکٹیں حاصل کیں، جبکہ ٹیسٹ ڈیبیو کرنے والے ثاقب خان نے ایک وکٹ اپنے نام کی۔ محمد عباس نے 14، رضاؤ اللہ نے 21 اور عامر جمال نے 24 رنز دے کر تین، تین کھلاڑیوں کو آؤٹ کیا۔

پاکستانی بیٹرز کی مزاحمت، غازی غوری کی نصف سنچری

پاکستانی اوپنرز اذان اویس اور طیب عارف نے 80 رنز کی ابتدائی شراکت قائم کرکے ٹیم کو مستحکم آغاز فراہم کیا۔ اذان اویس 47 جبکہ طیب عارف 46 رنز بنا کر آؤٹ ہوئے۔

سری لنکن بولرز نے پاکستان کے مڈل آرڈر کو دباؤ میں رکھا اور 221 رنز پر قومی ٹیم کی سات وکٹیں گر چکی تھیں، تاہم لوئر آرڈر نے ذمہ دارانہ اور جارحانہ بیٹنگ کے ذریعے اسکور کو 325 رنز تک پہنچا دیا۔

غازی غوری نے 54 رنز کی اہم اننگز کھیلتے ہوئے ٹیسٹ کیریئر کی پہلی نصف سنچری اسکور کی، جبکہ رضاؤ اللہ نے 32 گیندوں پر تیزی سے 42 رنز جوڑ کر پاکستانی برتری میں اضافہ کیا۔

نائٹ واچ مین ثاقب خان نے بھی 37 رنز کی عمدہ اننگز کھیل کر ٹیم کو سہارا دیا۔ پاکستان کی پوری ٹیم 87.5 اوورز میں 325 رنز بنا کر آؤٹ ہوئی اور سری لنکا کے خلاف 227 رنز کی برتری حاصل کرلی۔

سری لنکا کی جانب سے لہرو کمارا نے پانچ وکٹیں حاصل کرکے پاکستانی بیٹنگ کو نقصان پہنچایا، جبکہ اسیتھا فرنینڈو تین کھلاڑیوں کو آؤٹ کرنے میں کامیاب رہے۔

Leave A Reply

Your email address will not be published.