بلاول کے سسٹم ری سیٹ مطالبے پر خواجہ آصف کا جوابی وار

0

نیوز ڈیسک

اسلام آباد: وزیر دفاع خواجہ آصف نے بلاول بھٹو زرداری کے سسٹم ری سیٹ کے مطالبے پر ردعمل دیتے ہوئے کہا ہے کہ کسی بھی نظام میں تبدیلی کے لیے عوامی حمایت اور پارلیمانی بحث ضروری ہے، کیونکہ عوام کو ان کے بنیادی سیاسی حق سے محروم نہیں کیا جا سکتا۔

سماجی رابطے کی ویب سائٹ ایکس پر جاری بیان میں خواجہ آصف نے بلاول بھٹو کی حالیہ پریس کانفرنس کو تنقیدی قرار دیتے ہوئے کہا کہ نظام سے وابستہ سیاست دانوں کو اس میں اپنی ذمہ داریوں اور کردار کا بھی جائزہ لینا چاہیے۔

وزیر دفاع کے مطابق سیاست دانوں کا احتساب ایک معمول کا عمل ہے اور کوئی بھی اس سے بالاتر نہیں، تاہم بلاول بھٹو کی پریس کانفرنس میں زیادہ تر تنقید موجودہ حکومت اور نظام پر کی گئی۔

خواجہ آصف نے کہا کہ سیاسی فیصلوں کے لیے عوام سے رجوع کرنا کوئی چور دروازہ نہیں، بلکہ سیاست کی بنیاد ہی عوامی رائے ہے۔ ان کا کہنا تھا کہ سسٹم ری سیٹ کے معاملے پر پارلیمان میں بحث ہونی چاہیے اور عوامی رائے حاصل کرنا اس عمل کو قانونی اور جمہوری اعتبار سے مضبوط بنا سکتا ہے۔

بلاول بھٹو کو مخاطب کرتے ہوئے وزیر دفاع نے سندھ میں پیپلز پارٹی کی 18 سالہ حکومت اور کراچی کی صورتحال پر سوال اٹھاتے ہوئے کہا کہ پیپلز پارٹی 2022 سے وفاق میں مسلم لیگ (ن) کی اتحادی بھی ہے، اس لیے یہ دیکھنا ہوگا کہ مجوزہ تبدیلیوں سے سیاسی فائدہ کس کو پہنچے گا اور اس کے نتائج مسلم لیگ (ن) یا ملک کو کس صورت میں بھگتنا پڑیں گے۔

خواجہ آصف نے مزید کہا کہ انصاف اور مساوات کی بات کرنے والوں کو اپنے کردار اور طرزِ حکمرانی میں بھی ان اصولوں کی پاسداری کرنی چاہیے۔ 

انہوں نے زور دیا کہ حکمرانوں کو حاصل اختیار عوام کی امانت ہے، ذاتی میراث نہیں، جبکہ حکومت کی اصل ذمہ داری عوام کی زندگی بہتر بنانا اور انہیں حکمرانی کے عمل میں شریک کرنا ہے۔

Leave A Reply

Your email address will not be published.