نیوز ڈیسک
ممبئی: نانی کی نئی تیلگو ایکشن تھرلر فلم ’دی پیراڈائز‘ نے بھارتی باکس آفس پر شاندار آغاز کرتے ہوئے پریمیئر شوز سے 11 کروڑ روپے سے زائد کا بزنس کرلیا۔
بھارتی میڈیا رپورٹس کے مطابق فلم نے پریمیئر کلیکشن کے اعتبار سے ٹالی ووڈ کی چوتھی بڑی اوپننگ حاصل کی ہے، جبکہ ابتدائی اعداد و شمار میں اس نے’پشپا 2‘ کے پریمیئر بزنس کو بھی پیچھے چھوڑ دیا ہے۔
فلم کی ریلیز کے پہلے روز بھارت بھر میں تقریباً 900 شوز شیڈول کیے گئے، جس سے ناظرین کی جانب سے فلم میں ابتدائی دلچسپی کا اندازہ لگایا جا سکتا ہے۔
’دی پیراڈائز‘ کی پری سیل بھی مضبوط رہی، جس نے ریلیز سے قبل ہی فلم کے لیے توقعات بڑھا دی تھیں۔ تاہم، ابتدائی طور پر سامنے آنے والے ملے جلے یا منفی ردعمل کے باعث آنے والے دنوں میں فلم کے باکس آفس بزنس پر اثر پڑنے کا امکان ظاہر کیا جا رہا ہے۔
اس کے باوجود فلم کے پریمیئر شوز کی کمائی نے اسے ٹالی ووڈ کی بڑی اوپننگ والی فلموں میں شامل کر دیا ہے، جبکہ نانی کی باکس آفس پر مقبولیت بھی ایک بار پھر نمایاں ہوئی ہے۔
