نیوز ڈیسک
پاکستانی فلم انڈسٹری کی ماضی کی معروف اداکارہ نشو بیگم نے اپنی نجی زندگی سے متعلق ایسے انکشافات کیے ہیں جنہوں نے مداحوں کی توجہ حاصل کرلی ہے۔
اداکارہ نے بتایا کہ انہوں نے اپنے شوہر جمال پاشا سے شادی کرنے کے بعد ان کی پہلی بیوی اور بچوں کو بھی دوبارہ گھر بسانے میں مدد دی اور دونوں خاندانوں کے درمیان صلح کروانے میں اہم کردار ادا کیا۔
اپنے یوٹیوب چینل پر حالیہ وی لاگ میں گفتگو کرتے ہوئے نشو بیگم نے بتایا کہ جمال پاشا ان سے شادی سے قبل ہی شادی شدہ تھے، تاہم ان کی پہلی بیوی سے علیحدگی ہوچکی تھی۔
اداکارہ کے مطابق جمال پاشا انہیں شادی کے لیے راضی کرنے کی مسلسل کوشش کرتے رہے اور ایک موقع پر انہوں نے یہاں تک کہہ دیا کہ اگر نشو بیگم نے ان سے شادی نہ کی تو وہ اپنی زندگی ختم کرلیں گے۔
نشو بیگم کا کہنا تھا کہ وہ اس وقت سادہ طبیعت کی مالک تھیں اور جمال پاشا کی جذباتی باتوں سے متاثر ہوگئیں۔ انہوں نے انہیں سمجھانے کی کوشش کی کہ زندگی بہت قیمتی ہے اور شادی سے انکار پر خودکشی جیسا انتہائی قدم اٹھانا کسی صورت درست نہیں۔
شوہر کی پہلی بیوی کے لیے بھی کھلے گھر کے دروازے
اداکارہ نے اپنی گفتگو میں بتایا کہ شادی کے بعد انہوں نے جمال پاشا کی پہلی بیوی اور بچوں کو بھی واپس گھر لانے کا فیصلہ کیا، کیونکہ پہلی بیوی کے پاس اپنے گاؤں میں رہنے کے لیے مناسب جگہ موجود نہیں تھی۔
ان کے مطابق انہوں نے پہلی بیوی کو گھر واپس آنے کی دعوت دیتے ہوئے یقین دلایا کہ اسے اس کے تمام حقوق دیے جائیں گے اور اس کی ضروریات کا مکمل خیال رکھا جائے گا۔
نشو بیگم نے مزید بتایا کہ ابتدا میں انہوں نے جمال پاشا کی شادی کی پیشکش قبول نہیں کی تھی، تاہم ان کی جانب سے خودکشی کی کوشش کے واقعے نے انہیں اپنا فیصلہ بدلنے پر مجبور کردیا۔
اداکارہ کے مطابق جمال پاشا نے گولیاں کھا لی تھیں، جس کے بعد انہیں علاج کے لیے سروسز اسپتال منتقل کیا گیا، جہاں ڈاکٹروں نے ان کا معدہ صاف کیا۔
نشو بیگم کا کہنا تھا کہ بعض اوقات خواتین مردوں کی جذباتی باتوں اور اپیلوں سے متاثر ہوکر ان کے فیصلوں پر یقین کرلیتی ہیں۔
ان کے حالیہ وی لاگ میں ازدواجی زندگی کے ایسے کئی پہلو سامنے آئے ہیں جن سے ان کے مداح پہلے زیادہ واقف نہیں تھے۔
تین شادیوں سے گزرنے والی نشو بیگم کا فلمی سفر
واضح رہے کہ نشو بیگم کی ازدواجی زندگی مختلف نشیب و فراز سے گزری ہے۔ ان کی پہلی شادی انعام ربانی سے ہوئی تھی، تاہم یہ رشتہ زیادہ عرصہ برقرار نہ رہ سکا اور دونوں میں طلاق ہوگئی۔
بعد ازاں اداکارہ نے معروف شاعر اور نغمہ نگار تسلیم فاضلی سے شادی کی، جن کا 1982 میں انتقال ہوگیا۔ اس کے بعد نشو بیگم نے جمال پاشا سے تیسری شادی کی۔
فلمی کیریئر کی بات کی جائے تو نشو بیگم نے پاکستانی سینما کی متعدد کامیاب فلموں میں اپنی اداکاری کے جوہر دکھائے۔ ان کی نمایاں فلموں میں رنگیلا، جال، ٹائیگر گینگ، انسان اور گدھا، کبرا عاشق، بہشت، فرض اور شکوہ شامل ہیں۔
حالیہ برسوں میں بھی وہ فلم باجی اور ڈرامہ سیریل باغی میں اداکاری کرچکی ہیں، جبکہ ان دنوں یوٹیوب وی لاگز کے ذریعے اپنے مداحوں سے رابطے میں رہتی ہیں۔
