نیوز ڈیسک
اسلام آباد: پاک بحریہ، پاکستان میری ٹائم سیکیورٹی ایجنسی اور اینٹی نارکوٹکس فورس (اے این ایف) نے بحیرہ عرب میں مشترکہ انٹیلی جنس آپریشن کے دوران اسمگلنگ کی بڑی کوشش ناکام بناتے ہوئے 15 کروڑ روپے سے زائد مالیت کی غیر قانونی شراب برآمد کرلی۔
پاکستان میری ٹائم سیکیورٹی ایجنسی کے جاری کردہ بیان کے مطابق مشترکہ کارروائی کے دوران بغیر کسی شناخت کے سمندر میں سفر کرنے والے ایک مشکوک جہاز کو روک کر تحویل میں لیا گیا۔
بیان میں بتایا گیا ہے کہ متعلقہ اداروں نے خفیہ معلومات کی بنیاد پر سمندری نگرانی اور مشترکہ گشت کے دوران مشکوک جہاز کی نشاندہی کی، جس کے بعد اسے روک کر تلاشی لی گئی۔
جہاز کی تفصیلی تلاشی کے دوران بھاری مقدار میں غیر قانونی شراب برآمد ہوئی، جس کی مالیت 15 کروڑ روپے سے زائد بتائی گئی ہے۔ یہ شراب مبینہ طور پر غیر قانونی تقسیم کے لیے منتقل کی جا رہی تھی۔
پاکستان میری ٹائم سیکیورٹی ایجنسی کے مطابق کارروائی کے بعد جہاز اور برآمد شدہ سامان سے متعلق معاملہ مزید تحقیقات اور قانونی کارروائی کے لیے اینٹی نارکوٹکس فورس سندھ کے حوالے کردیا گیا ہے۔
پریس ریلیز میں کہا گیا ہے کہ آپریشن کی کامیابی میں بروقت انٹیلی جنس معلومات کے تبادلے، حقیقی وقت میں رابطہ کاری اور مختلف قانون نافذ کرنے والے اداروں کے درمیان مؤثر تعاون نے اہم کردار ادا کیا۔
میری ٹائم سیکیورٹی ایجنسی نے اس کارروائی کو پاکستان کے بحری اور قانون نافذ کرنے والے اداروں کے درمیان مضبوط اشتراک کی مثال قرار دیتے ہوئے کہا ہے کہ ملکی سمندری حدود کے تحفظ، اسمگلنگ نیٹ ورکس کے خاتمے اور بحیرہ عرب میں مؤثر نگرانی کے لیے مشترکہ اقدامات جاری رکھے جائیں گے۔
