ربیعہ احسن قتل کیس میں نیا موڑ، اہلِ خانہ کو قتل حادثہ لگنے لگا

0

نیوز ڈیسک

راولپنڈی: نجی ٹی وی کی اینکر پرسن ربیعہ احسن کے قتل کیس میں اہم پیش رفت سامنے آئی ہے، جہاں مقتولہ کے اہلِ خانہ نے ان کے شوہر اور مقدمے کے ملزم احسن طاہر کو معاف کرنے کا اعلان کردیا، جبکہ مقامی عدالت نے ملزم کی درخواستِ ضمانت بعد از گرفتاری بھی منظور کرلی ہے۔

راولپنڈی کی مقامی عدالت میں جمعرات کو درخواستِ ضمانت کی سماعت ہوئی، جس کے بعد ایڈیشنل سیشن جج خرم سلیم نے ملزم احسن طاہر کو 2 لاکھ روپے کے ضمانتی مچلکے جمع کرانے کے عوض رہا کرنے کا حکم دیا۔

سماعت کے دوران مدعی مقدمہ اور مقتولہ کے بھائی خرم احمد کی جانب سے ان کی وکیل صبا فراز راجہ عدالت میں پیش ہوئیں اور اہلِ خانہ کا تحریری حلف نامہ جمع کرایا۔

عدالت میں پیش کیے گئے حلف نامے میں مقتولہ کے اہلِ خانہ نے مؤقف اختیار کیا کہ وہ مکمل تحقیق اور تسلی کے بعد اس نتیجے پر پہنچے ہیں کہ احسن طاہر نے ان کی بہن کو جان بوجھ کر قتل نہیں کیا بلکہ یہ واقعہ حادثاتی طور پر پیش آیا۔

حلف نامے کے مطابق اہلِ خانہ نے اللہ کی رضا کے لیے ملزم کو معاف کردیا ہے اور انہیں اس کی ضمانت منظور ہونے پر بھی کوئی اعتراض نہیں۔

واضح رہے کہ واقعے کے فوراً بعد سوشل میڈیا پر بھی مقتولہ کے اہلِ خانہ کی جانب سے ملزم کو معاف کرنے کی خبریں گردش کرنے لگی تھیں، تاہم اس وقت ربیعہ احسن کے بھائی نے ان اطلاعات کی تردید کردی تھی۔

ربیعہ احسن کی موت کیسے ہوئی؟

نجی ٹی وی کی اینکر پرسن ربیعہ احسن 8 نومبر کو راولپنڈی کے علاقے گلشن آباد میں اپنے گھر پر گولی لگنے سے جاں بحق ہوگئی تھیں۔ واقعے کے بعد پولیس نے ان کے شوہر احسن طاہر کو گرفتار کرلیا تھا۔

مقدمے کی ایف آئی آر کے مطابق فائرنگ کے وقت مقتولہ کی والدہ اور بہن گھر کے لان میں موجود تھیں۔ گولی کی آواز سن کر دونوں کمرے میں پہنچیں تو ربیعہ احسن خون میں لت پت فرش پر پڑی تھیں، جبکہ ان کے شوہر احسن طاہر کے ہاتھ میں پستول موجود تھا۔

واقعے کے بعد سی پی او راولپنڈی حسن مشتاق سکھیرا نے میڈیا کو بتایا تھا کہ ابتدائی تفتیش میں یہ بات سامنے آئی ہے کہ گولی ملزم احسن طاہر کے ہاتھ سے چلی تھی، تاہم فائر جان بوجھ کر کیا گیا یا حادثاتی طور پر، اس حوالے سے تحقیقات جاری تھیں۔

ملزم احسن طاہر کا پولیس کو دیا گیا بیان

پولیس تفتیش کے دوران احسن طاہر نے دعویٰ کیا تھا کہ وہ الماری سے کپڑے نکال رہے تھے کہ اس دوران انہوں نے پستول اٹھا لیا۔ ان کے بقول میگزین موجود نہ ہونے کی وجہ سے انہیں یقین تھا کہ پستول خالی ہے۔

ملزم نے اپنے بیان میں کہا تھا کہ انہوں نے مذاق میں ربیعہ کی جانب پستول تان کر ٹریگر دبایا، تاہم اچانک گولی چل گئی جس سے ان کی اہلیہ جاں بحق ہوگئیں۔

تفتیشی ریکارڈ کے مطابق ربیعہ احسن اور احسن طاہر نے 2010 میں پسند کی شادی کی تھی اور دونوں ماضی میں ایک نجی بینک میں اکٹھے ملازمت بھی کرچکے تھے۔

احسن طاہر نے پولیس کو بتایا تھا کہ کورونا وبا کے دوران ان کی اہلیہ نے بیوٹی سیلون قائم کیا تھا، جہاں دو خواتین ملازماؤں کے درمیان تنازع پیدا ہوا۔ ملزم کے مطابق ایک ملازمہ نے دوسری کو ملازمت سے نکلوانے کے لیے اس پر احسن طاہر کے ساتھ تعلقات کا جھوٹا الزام عائد کیا تھا۔

ان کے بقول اس معاملے پر میاں بیوی کے درمیان کچھ عرصے کے لیے ناراضی پیدا ہوئی، تاہم بعد میں اہلیہ کو وضاحت دینے کے بعد معاملہ حل ہوگیا تھا۔

ملزم نے دعویٰ کیا تھا کہ ان کی 16 سالہ ازدواجی زندگی میں اس واقعے کے علاوہ کوئی بڑا تنازع نہیں ہوا اور دونوں روزانہ شام کو جم میں اکٹھے بیڈمنٹن بھی کھیلا کرتے تھے۔

پولیس تفتیش اور ضمانت کی پیش رفت

گزشتہ روز پولیس نے احسن طاہر کا 9 روزہ جسمانی ریمانڈ مکمل ہونے کے بعد انہیں جوڈیشل ریمانڈ پر جیل بھیجنے کی استدعا کی تھی، جسے عدالت نے منظور کرلیا تھا۔

پولیس نے عدالت کو آگاہ کیا تھا کہ ملزم کے ڈی این اے اور پولی گرافک ٹیسٹ بھی مکمل کیے جاچکے ہیں۔

اب مقتولہ کے اہلِ خانہ کی جانب سے معافی کے حلف نامے اور ضمانت پر عدم اعتراض کے بعد عدالت نے ملزم کی بعد از گرفتاری ضمانت منظور کرلی ہے۔

تاہم ضمانت کی منظوری مقدمے کے حتمی فیصلے کے مترادف نہیں، جبکہ واقعے کی قانونی نوعیت اور ذمہ داری کا تعین عدالتی کارروائی اور دستیاب شواہد کی روشنی میں ہوگا۔

Leave A Reply

Your email address will not be published.