نیوز ڈیسک
اورماڑہ: بلوچستان کی مکران کوسٹل ہائی وے پر اورماڑہ کے قریب مسافر کوچ اور گیس باؤزر کے درمیان خوفناک تصادم کے نتیجے میں دونوں گاڑیوں میں آگ بھڑک اٹھی، جس کے باعث 10 افراد جھلس کر جاں بحق اور 22 زخمی ہوگئے۔
حادثہ مکران کوسٹل ہائی وے پر بسول کے مقام پر پیش آیا، جہاں تربت سے کراچی جانے والی مسافر کوچ سامنے سے آنے والے گیس باؤزر سے ٹکرا گئی۔ تصادم اتنا شدید تھا کہ دونوں گاڑیوں میں آگ لگ گئی اور دیکھتے ہی دیکھتے شعلوں نے انہیں اپنی لپیٹ میں لے لیا۔
ریسکیو ذرائع کے مطابق حادثے میں مسافر کوچ میں سوار 8 افراد جبکہ گیس باؤزر کے ڈرائیور اور کلینر سمیت مجموعی طور پر 10 افراد جاں بحق ہوئے۔ جاں بحق ہونے والوں میں 3 بچے بھی شامل ہیں۔ تمام افراد کی موت جھلسنے کے باعث ہوئی۔
حادثے میں 22 افراد زخمی بھی ہوئے، جنہیں امدادی ٹیموں نے فوری طور پر قریبی اسپتالوں میں منتقل کردیا۔
واقعے کی اطلاع ملتے ہی میونسپل کمیٹی اورماڑہ کی فائر بریگیڈ، ریسکیو ٹیمیں اور پولیس جائے حادثہ پر پہنچ گئیں۔ امدادی اہلکاروں نے کارروائی کرتے ہوئے دونوں گاڑیوں میں لگی آگ پر قابو پایا اور متاثرہ افراد کو ریسکیو کیا۔
حادثے کی سی سی ٹی وی فوٹیج بھی سامنے آگئی ہے، جس میں مسافر کوچ اور گیس باؤزر کو آپس میں ٹکراتے دیکھا جاسکتا ہے۔
وزیراعلیٰ بلوچستان نے حادثے میں قیمتی انسانی جانوں کے ضیاع پر افسوس کا اظہار کرتے ہوئے متعلقہ حکام کو زخمیوں کو فوری اور بہترین طبی سہولیات فراہم کرنے کی ہدایت کی ہے۔
بلوچستان میں ٹریفک حادثات کی بڑھتی ہوئی شرح
بلوچستان میں حالیہ عرصے کے دوران پیش آنے والے متعدد مہلک ٹریفک حادثات نے شاہراہوں پر مسافروں کی حفاظت اور ٹرانسپورٹ کے انتظامات سے متعلق سوالات کو ایک بار پھر نمایاں کردیا ہے۔
گزشتہ 23 اکتوبر کو ضلع لسبیلہ میں اوتھل کے قریب زیرو پوائنٹ پر مسافر بس اور ویگن کے درمیان تصادم کے نتیجے میں 10 افراد جاں بحق اور متعدد زخمی ہوگئے تھے۔
اسی طرح 3 جولائی کو ضلع شیرانی کے علاقے دانہ سر میں مسافر بس کے المناک حادثے میں 40 افراد جان کی بازی ہار گئے تھے، جن میں خواتین اور بچے بھی شامل تھے۔
اس وقت وزیراعلیٰ بلوچستان کے معاون خصوصی شاہد رند نے بتایا تھا کہ حادثے کا شکار بس میں ایک دوسری خراب ہونے والی مسافر بس کے مسافر بھی سوار تھے، جس کے باعث گاڑی میں گنجائش سے زیادہ افراد موجود تھے۔
حادثے میں زخمی ہونے والے ایک مسافر نے انکشاف کیا تھا کہ وہ کوئٹہ سے پشاور جانے والی بس میں سفر کررہا تھا اور ڈرائیور نے مسافروں کو آگاہ کیے بغیر گاڑی میں ڈیزل لوڈ کیا تھا۔ تاہم بلوچستان کی آخری ایف سی چیک پوسٹ پر بس سے ڈیزل اتار دیا گیا تھا۔
مکران کوسٹل ہائی وے پر تازہ حادثہ ایک بار پھر بلوچستان کی اہم شاہراہوں پر ٹریفک قوانین، گاڑیوں کی فٹنس، محفوظ ٹرانسپورٹ اور مسافروں کے تحفظ کے مؤثر اقدامات کی ضرورت اجاگر کرتا ہے۔
