ایران پر حملے کے لیے اسرائیل سرگرم، ٹرمپ کا اہم اشارہ

0

نیوز ڈیسک

امریکی صدر ڈونلڈ ٹرمپ نے ایران کے خلاف ممکنہ نئی فوجی کارروائی کے حوالے سے فوری فیصلہ کرنے سے گریز کرتے ہوئے معاملے کو نئے سال تک مؤخر کرنے کا عندیہ دیا ہے۔ 

ان کے حالیہ بیانات اور امریکی و اسرائیلی ذرائع ابلاغ کی رپورٹس سے ظاہر ہوتا ہے کہ واشنگٹن میں ایران کے خلاف دوبارہ جنگ شروع کرنے کے معاملے پر غور جاری ہے، تاہم امریکی انتظامیہ اس حوالے سے یکساں مؤقف نہیں رکھتی۔

خبر رساں ادارے ایکسیوس اور اسرائیلی ٹی وی چینل 12 کو انٹرویوز میں ٹرمپ نے کہا کہ وہ ایران کے معاملے پر کوئی بھی فیصلہ جلد بازی میں نہیں کریں گے اور نئے سال کے آغاز کے بعد صورت حال کا جائزہ لیں گے۔

جب ان سے پوچھا گیا کہ کیا ایران پر نیا حملہ اسی عرصے میں کیا جا سکتا ہے جس دوران رواں سال فروری کے آغاز میں جنگ شروع ہوئی تھی تو امریکی صدر نے اس امکان کو بھی مسترد نہیں کیا۔

دوسری جانب امریکی اخبار نیویارک ٹائمز نے امریکی اور اسرائیلی حکام کے حوالے سے رپورٹ کیا ہے کہ ٹرمپ ایران پر بڑے پیمانے پر دوبارہ فوجی حملوں کے امکانات کا جائزہ لے رہے ہیں۔

رپورٹ کے مطابق اسرائیلی وزیراعظم بنیامین نیتن یاہو چاہتے ہیں کہ امریکا چار سے سات روز تک جاری رہنے والی فضائی کارروائی میں اسرائیل کا ساتھ دے۔ اس سلسلے میں اسرائیل نے ایران سے متعلق اپنی تازہ انٹیلی جنس معلومات بھی امریکی صدر کے سامنے پیش کی ہیں۔

ان اطلاعات میں دعویٰ کیا گیا ہے کہ ایران اپنے میزائلوں اور ڈرونز کے ذخائر دوبارہ تیار کر رہا ہے، جبکہ کیمیائی اور حیاتیاتی ہتھیاروں کے پروگراموں میں بھی پیش رفت کر رہا ہے۔

امریکی صدر مشرق وسطیٰ میں پہلے سے تعینات امریکی فوجی قوت کو بھی ممکنہ کارروائی کے لیے ایک اہم موقع کے طور پر دیکھ رہے ہیں۔

اسرائیل کی کوششیں اور امریکی تحفظات

ایران کے خلاف ممکنہ نئی فوجی کارروائی کے معاملے پر واشنگٹن اور تل ابیب کے درمیان رابطوں نے خطے کی صورت حال کو مزید حساس بنا دیا ہے۔

اسرائیلی ٹی وی چینل 12 کے مطابق بعض امریکی حکام کو نیتن یاہو کی جانب سے ایران کے خلاف دوبارہ جنگ شروع کرنے کے مبینہ دباؤ پر تحفظات ہیں۔

ٹرمپ کے انتہائی قریبی سمجھے جانے والے ایک امریکی عہدیدار نے دعویٰ کیا کہ اسرائیلی وزیراعظم کی جانب سے یہ دباؤ سیاسی مقاصد کے تحت بھی ڈالا جا رہا ہے، کیونکہ نیتن یاہو 27 اکتوبر کو ہونے والے انتخابات کے تناظر میں اپنی سیاسی پوزیشن برقرار رکھنے کی کوشش کر رہے ہیں۔

تاہم ایک سینئر اسرائیلی عہدیدار نے اس تاثر کو مسترد کرتے ہوئے کہا ہے کہ نیتن یاہو نے امریکی صدر پر ایران کے خلاف حملے کے لیے دباؤ نہیں ڈالا۔ اسرائیلی وزیراعظم کے ترجمان کے مطابق نیتن یاہو ہمیشہ اسرائیل کی سلامتی کے تحفظ کے لیے کام کرتے رہے ہیں۔

ادھر گزشتہ ہفتے ایران سے متعلق امریکی اور اسرائیلی رابطوں میں بھی تیزی دیکھنے میں آئی۔ اسرائیلی خفیہ ایجنسی موساد کے سربراہ رومن گوفمین نے واشنگٹن کا دورہ کیا، جہاں انہوں نے امریکی انتظامیہ کے اعلیٰ حکام، جن میں سی آئی اے کے سربراہ جان ریٹکلف بھی شامل تھے، سے ملاقاتیں کیں۔

اسرائیلی فوج کے شعبہ ملٹری انٹیلی جنس کے سربراہ میجر جنرل شلومی بائنڈر نے بھی امریکی حکام سے ملاقاتوں کے دوران ایران کے خلاف فوجی کارروائیوں کی بحالی کی حمایت کی۔

ٹرمپ انتظامیہ میں نئی جنگ پر اختلافات

ایران کے خلاف دوبارہ فوجی کارروائی کے امکان پر امریکی انتظامیہ کے اندر بھی اختلافات سامنے آئے ہیں۔ نیویارک ٹائمز کے مطابق بعض امریکی حکام اسرائیلی انٹیلی جنس کی فراہم کردہ معلومات کی درستگی اور ایران پر دوبارہ حملوں کی ضرورت کے حوالے سے سوالات اٹھا رہے ہیں۔

رپورٹ کے مطابق ریپبلکن پارٹی کو وسط مدتی انتخابات میں شکست کے بعد نئی جنگ کے ممکنہ سیاسی اور عسکری نتائج کے حوالے سے امریکی انتظامیہ کے بعض حلقوں میں تحفظات مزید بڑھ گئے ہیں۔

ٹرمپ گزشتہ چند ماہ کے دوران ایران جنگ سے متعلق متعدد مرتبہ اپنا مؤقف تبدیل کر چکے ہیں۔ کبھی انہوں نے جنگ کے خاتمے کا عندیہ دیا تو کبھی ایران کو جوہری ہتھیار حاصل کرنے سے روکنے کے لیے مزید فوجی حملوں کا امکان ظاہر کیا۔

ایسے میں ایران کے خلاف کسی نئی کارروائی کا فیصلہ نئے سال تک مؤخر کرنے کا عندیہ ظاہر کرتا ہے کہ واشنگٹن فی الحال اگلے قدم کے حوالے سے محتاط رویہ اختیار کیے ہوئے ہے، تاہم اسرائیلی مطالبات، انٹیلی جنس اطلاعات اور مشرق وسطیٰ میں امریکی فوجی موجودگی کے باعث خطے میں کشیدگی دوبارہ بڑھنے کے امکانات برقرار ہیں۔

Leave A Reply

Your email address will not be published.