نیوز ڈیسک
نیویارک: گزشتہ 25 برسوں میں عالمی سینما نے موضوعات، کہانیوں، ٹیکنالوجی اور فلم سازی کے انداز میں غیر معمولی تبدیلیاں دیکھی ہیں۔ اسٹریمنگ پلیٹ فارمز کے بڑھتے ہوئے رجحان اور سپر ہیرو فلموں کی مقبولیت کے باوجود کئی ایسی فلمیں بھی سامنے آئیں جنہوں نے نہ صرف عالمی سطح پر شائقین کی توجہ حاصل کی بلکہ سینما کی تاریخ میں اپنی مستقل جگہ بنا لی۔
امریکی اخبار نیویارک ٹائمز نے 21ویں صدی کی 100 بہترین فلموں کی فہرست جاری کی ہے، جس کی تیاری میں دنیا بھر کے 500 سے زائد نامور ہدایت کاروں، اداکاروں اور فلمی ناقدین کی آراء شامل کی گئیں۔ اس فہرست میں مختلف زبانوں، ثقافتوں اور خطوں سے تعلق رکھنے والی فلموں کو ان کی کہانی، فنی معیار اور عالمی سینما پر اثرات کی بنیاد پر جگہ دی گئی ہے۔
اس فہرست میں جنوبی کوریا کے معروف ہدایت کار بونگ جون ہو کی فلم ’پیراسائٹ‘ (2019) نے پہلی پوزیشن حاصل کی ہے، جو طبقاتی تقسیم، معاشی ناہمواری اور سماجی تضادات کو منفرد انداز میں پیش کرتی ہے۔
فلم کی کہانی ایک غریب خاندان کے گرد گھومتی ہے جو مختلف حربوں کے ذریعے ایک امیر گھرانے کی زندگی میں جگہ بناتا ہے۔ سماجی طنز، مزاح، سنسنی اور المیے کا امتزاج اس فلم کو منفرد بناتا ہے۔ ’پیراسائٹ‘ نے عالمی سطح پر غیر معمولی پذیرائی حاصل کرنے کے ساتھ آسکر ایوارڈز میں بہترین فلم کا اعزاز بھی اپنے نام کیا تھا۔
فہرست میں دوسری پوزیشن ڈیوڈ لنچ کی پراسرار نفسیاتی فلم ’ملہولینڈ ڈرائیو‘ (2001) کے حصے میں آئی ہے۔ لاس اینجلس اور ہالی ووڈ کی چمکتی دمکتی دنیا کے پس پردہ چھپے تاریک پہلوؤں، شناخت کے بحران اور خواب و حقیقت کے درمیان الجھنوں کو موضوع بنانے والی یہ فلم آج بھی عالمی سینما کی اہم ترین تخلیقات میں شمار ہوتی ہے۔
تیسری پوزیشن پال تھامس اینڈرسن کی فلم ’دیر ول بی بلڈ‘ (2007) نے حاصل کی۔ ڈینیئل ڈے-لیوس کی شاندار اداکاری سے مزین یہ فلم تیل کی صنعت کے ابتدائی دور میں دولت، طاقت، لالچ اور انسانی حرص کی کہانی بیان کرتی ہے۔
چوتھے نمبر پر وونگ کار-وائی کی ہانگ کانگ میں بنائی گئی رومانوی فلم ’ان دی موڈ فار لو‘ (2001) شامل ہے، جو خاموش محبت، تنہائی اور ادھورے جذبات کو اپنی دلکش سنیماٹوگرافی اور منفرد بیانیے کے ذریعے پیش کرتی ہے۔
اسی طرح پانچویں نمبر پر بیری جینکنز کی آسکر ایوارڈ یافتہ فلم ’مون لائٹ‘ (2016) رہی، جو میامی میں ایک سیاہ فام نوجوان کی زندگی کے تین مختلف مراحل، شناخت کی تلاش اور جذباتی کشمکش کو انتہائی حساس انداز میں دکھاتی ہے۔
ٹاپ 10 میں کون سی فلمیں شامل ہیں؟
نیویارک ٹائمز کی فہرست میں چھٹے نمبر پر کوئن برادران کی کرائم تھرلر ’نو کنٹری فار اولڈ مین‘، ساتویں نمبر پر مائیکل گونڈری کی رومانوی سائنس فکشن فلم ’ایٹرنل سن شائن آف دی اسپاٹ لیس مائنڈ‘ اور آٹھویں نمبر پر جارڈن پیل کی سماجی موضوعات پر مبنی ہارر فلم ’گیٹ آؤٹ‘ شامل ہے۔
فہرست میں نویں پوزیشن جاپانی ہدایت کار ہایاؤ میازاکی کی اینیمیٹڈ فلم ’اسپرٹڈ اوے‘ نے حاصل کی، جبکہ دسویں نمبر پر ڈیوڈ فنچر کی معروف فلم ’دی سوشل نیٹ ورک‘ رہی، جو فیس بک کے قیام اور اس کے بانی مارک زکربرگ کے سفر کی کہانی بیان کرتی ہے۔
فلمی ناقدین اور شائقین کے لیے یہ فہرست گزشتہ ربع صدی کے سینما کا ایک دلچسپ جائزہ پیش کرتی ہے، جس میں ہالی ووڈ کے ساتھ ایشیائی اور دیگر عالمی فلمی صنعتوں کی تخلیقات کو بھی نمایاں مقام دیا گیا ہے۔
یہ انتخاب اس حقیقت کی عکاسی کرتا ہے کہ سینما میں ٹیکنالوجی، بجٹ اور خصوصی بصری اثرات کی اہمیت اپنی جگہ، لیکن ایک مضبوط کہانی، انسانی جذبات اور سماجی حقیقتوں کی مؤثر عکاسی ہی کسی فلم کو وقت کے ساتھ زندہ رکھتی ہے۔
