نیوز ڈیسک
واٹس ایپ صارفین کی پرائیویسی مزید مضبوط بنانے کے لیے ایک نئے فیچر پر کام کر رہا ہے، جس کے ذریعے صارفین یہ طے کر سکیں گے کہ چیٹس اور کالز کے دوران ان کا فون نمبر کن افراد کو دکھائی دے اور کن سے پوشیدہ رہے۔
ٹیکنالوجی ویب سائٹ ’واٹس ایپ بیٹا انفو‘ کے مطابق اس نئے فیچر کی نشاندہی اینڈرائیڈ کے بیٹا ورژن 2.26.45.1 میں ہوئی ہے، جس میں فون نمبر کی نمائش کو کنٹرول کرنے کے لیے نئی پرائیویسی سیٹنگز شامل کی جا رہی ہیں۔
رپورٹ کے مطابق صارفین کو اس مقصد کے لیے چار اختیارات فراہم کیے جائیں گے، جن میں سبھی افراد، صرف محفوظ شدہ رابطے، منتخب رابطوں کے علاوہ دیگر افراد اور کسی کو بھی فون نمبر نہ دکھانے کا آپشن شامل ہے۔
اس سہولت کے ذریعے صارفین اپنی مرضی کے مطابق فون نمبر کی نمائش محدود کر سکیں گے، جس سے غیر ضروری افراد کے ساتھ ذاتی رابطہ معلومات شیئر ہونے کے امکانات کم ہو جائیں گے۔
تاہم رپورٹ میں واضح کیا گیا ہے کہ یہ فیچر صرف ان صارفین کے لیے دستیاب ہوگا جنہوں نے واٹس ایپ پر اپنا یوزرنیم ترتیب دیا ہوگا۔ اس کے علاوہ جن افراد کے فون میں صارف کا نمبر پہلے سے محفوظ ہے، وہ بدستور اسے دیکھ سکیں گے۔
یہ اقدام واٹس ایپ کی جانب سے صارفین کو فون نمبر کے بجائے یوزرنیم کے ذریعے رابطے کی سہولت دینے اور ذاتی معلومات کے تحفظ کو بہتر بنانے کی کوششوں کا حصہ ہے۔
