نیوز ڈیسک
ڈھاکہ: بنگلہ دیش کی معزول وزیر اعظم شیخ حسینہ نے بنگلہ دیشی حکام سے نئے پاسپورٹ اور قومی شناختی کارڈ کے اجرا کے لیے باضابطہ درخواست دے دی ہے، جسے ان کی ممکنہ وطن واپسی کی جانب ایک اہم پیش رفت قرار دیا جا رہا ہے۔
برطانوی خبر رساں ادارے رائٹرز کے مطابق، اگست 2024 میں حکومت مخالف عوامی احتجاج کے نتیجے میں اقتدار سے بے دخل ہونے اور ملک چھوڑ کر بھارت منتقل ہونے کے بعد یہ شیخ حسینہ کا بنگلہ دیش کی نئی حکومت سے پہلا باضابطہ رابطہ ہے۔
لندن میں قائم قانونی فرم ‘میٹرکس چیمبرز’ (Matrix Chambers) سے تعلق رکھنے والے ان کے وکلاء نے نئی دہلی میں بنگلہ دیش کی قائم مقام ہائی کمشنر پریتی رحمان کو خط ارسال کیا ہے، جس میں شیخ حسینہ کے لیے نئے سفری اور شناختی دستاویزات فوری جاری کرنے کی درخواست کی گئی ہے۔
وکلاء کے مطابق، ان کی موکلہ کا سابقہ پاسپورٹ اور قومی شناختی کارڈ مبینہ طور پر عبوری حکومت اور متعلقہ حکام نے منسوخ کر دیا تھا۔ خط میں مؤقف اختیار کیا گیا ہے کہ بنگلہ دیشی شہری ہونے کی حیثیت سے شیخ حسینہ ملکی قوانین اور بین الاقوامی انسانی حقوق کے معاہدوں کے تحت ان دستاویزات کے حصول کی حق دار ہیں۔
وکلاء نے حکام سے درخواست پر بلا تاخیر کارروائی کرنے کا مطالبہ کیا ہے، تاہم نئی دہلی میں بنگلہ دیشی ہائی کمیشن اور ڈھاکہ کے حکام کی جانب سے تاحال کوئی باضابطہ ردعمل سامنے نہیں آیا۔
یہ پیش رفت ایسے وقت میں سامنے آئی ہے جب دسمبر میں شیخ حسینہ کی وطن واپسی کے حوالے سے قیاس آرائیاں جاری ہیں۔ ان کی واپسی ملک میں پہلے سے موجود سیاسی اور قانونی کشیدگی کو مزید بڑھا سکتی ہے۔
دوسری جانب، شیخ حسینہ کی جماعت عوامی لیگ کو ان کی حکومت کے خاتمے کے بعد پابندی کا سامنا ہے، جبکہ جماعت کے متعدد سینئر رہنما اور سابق وزراء جیلوں میں ہیں یا بھارت سمیت دیگر ممالک میں جلاوطنی کی زندگی گزار رہے ہیں۔
شیخ حسینہ مختلف ادوار میں تقریباً 20 سال تک بنگلہ دیش کی وزیر اعظم رہ چکی ہیں۔ اگست 2024 میں بڑے پیمانے پر ہونے والے حکومت مخالف مظاہروں کے نتیجے میں انہیں اقتدار چھوڑنا پڑا تھا، جس کے بعد وہ بھارت منتقل ہو گئی تھیں۔
تجزیہ کاروں کے مطابق، ان کی ممکنہ وطن واپسی بنگلہ دیش میں سیاسی تقسیم کو مزید گہرا کر سکتی ہے۔ تاہم، اس پیش رفت سے بھارت اور بنگلہ دیش کے درمیان کشیدہ تعلقات میں بہتری کے امکانات بھی پیدا ہو سکتے ہیں، جو شیخ حسینہ کو بھارت میں پناہ دیے جانے کے بعد مزید تناؤ کا شکار ہوئے تھے۔
