نیوز ڈیسک
فیصل آباد: پنجاب کے ضلع فیصل آباد کی تحصیل تاندلیانوالہ میں انسانیت سوز واقعہ پیش آیا ہے، جہاں مبینہ طور پر بھیک مانگ کر کم رقم لانے پر ایک شخص نے اپنی 10 سالہ بھتیجی کو پیٹرول چھڑک کر آگ لگا دی، جس کے نتیجے میں بچی شدید جھلس گئی۔
پولیس کے مطابق، واقعے کے بعد بچی کو فوری طور پر قریبی اسپتال منتقل کیا گیا، جہاں اس کا علاج جاری ہے۔ ڈاکٹروں کے مطابق بچی کی حالت تشویشناک ہے۔
پولیس نے واقعے کا نوٹس لیتے ہوئے مرکزی ملزم عامر مشتاق کو گرفتار کر لیا ہے۔
ابتدائی تحقیقات کے مطابق، ملزم مبینہ طور پر اپنی کم سن بھتیجی کو بھیک مانگنے پر مجبور کرتا تھا۔ واقعے کے روز جب بچی توقع سے کم رقم لے کر گھر واپس پہنچی تو ملزم مشتعل ہوگیا اور اس پر پیٹرول چھڑک کر آگ لگا دی۔
پولیس نے ملزم کے خلاف مقدمہ درج کرکے مزید تفتیش شروع کر دی ہے، جبکہ واقعے کے تمام پہلوؤں کا جائزہ لیا جا رہا ہے۔
دوسری جانب، اسپتال انتظامیہ کے مطابق بچی کی حالت بدستور تشویشناک ہے اور طبی عملہ اس کی جان بچانے کے لیے ہر ممکن کوشش کر رہا ہے۔
