نیوز ڈیسک
پشاور: پاکستان کی سیکیورٹی فورسز نے ایک اہم کارروائی کے دوران افغان صوبے چمکنی سے تعلق رکھنے والے مبینہ غیر ملکی دہشت گرد حکمت اللہ کو گرفتار کرلیا ہے، جس کے بارے میں انکشاف ہوا ہے کہ وہ ماضی میں افغان نیشنل آرمی (اے این اے) کا حصہ رہ چکا ہے۔
پولیس حکام کے مطابق گرفتار ملزم سے دورانِ تفتیش پاکستان مخالف دہشت گردانہ سرگرمیوں، افغان سرزمین کے استعمال اور مختلف دہشت گرد نیٹ ورکس سے متعلق اہم معلومات حاصل ہوئی ہیں۔
ایڈیشنل انسپکٹر جنرل کاؤنٹر ٹیررازم ڈیپارٹمنٹ (سی ٹی ڈی) عباس احسن نے پشاور میں پریس کانفرنس کرتے ہوئے بتایا کہ گرفتار ملزم حکمت اللہ سے تفتیش کے دوران انتہائی اہم اور حساس انکشافات سامنے آئے ہیں۔
تفتیشی حکام کے مطابق ملزم افغان نیشنل آرمی میں خدمات انجام دینے کے علاوہ درس و تدریس کے شعبے سے بھی وابستہ رہا ہے۔ حکام نے اس گرفتاری کو صوبے میں دہشت گردی کے خلاف جاری کارروائیوں میں ایک اہم کامیابی قرار دیا ہے۔
اس موقع پر نگراں صوبائی وزیر محمود خان نے کہا کہ حکمت اللہ کی گرفتاری اس بات کا ثبوت ہے کہ افغان سرزمین پاکستان کے خلاف دہشت گردانہ سرگرمیوں کے لیے استعمال ہو رہی ہے۔
انہوں نے کہا کہ پاکستان متعدد مرتبہ افغان حکام کو اس حوالے سے ٹھوس شواہد فراہم کر چکا ہے، جبکہ دہشت گردی سے متعلق اپنا مؤقف اور دستیاب ثبوت عالمی برادری کے سامنے بھی پیش کیے جا چکے ہیں۔
دورانِ تفتیش گرفتار ملزم حکمت اللہ نے اعتراف کیا کہ اس نے اردو زبان کی تربیت حاصل کر رکھی تھی اور فکری مغالطے کا شکار ہوکر غلط راستے پر چل پڑا تھا۔
اپنے بیان میں ملزم نے دعویٰ کیا کہ وہ نام نہاد جہاد کے نام پر پاکستان میں مختلف دہشت گردانہ کارروائیوں میں ملوث رہا ہے۔ اس نے مزید کہا کہ گرفتاری کے بعد پاکستانی سیکیورٹی فورسز نے اس کے ساتھ ذمہ دارانہ اور مناسب سلوک کیا۔
حکام کے مطابق گرفتار ملزم سے حاصل ہونے والی معلومات کی بنیاد پر مزید تحقیقات جاری ہیں اور دہشت گرد نیٹ ورکس کے خلاف کارروائیوں کا دائرہ وسیع کیا جا رہا ہے۔
