نیوز ڈیسک
اسلام آباد: پاکستان میں پولیو وائرس کا پھیلاؤ بدستور تشویش کا باعث ہے، جہاں سال 2026 کے دوران اب تک اس مرض کے 9 کیسز رپورٹ ہو چکے ہیں۔ ان میں سے 7 کیسز خیبر پختونخوا جبکہ 2 سندھ سے سامنے آئے ہیں۔
پولیو کے بڑھتے خطرے کے پیش نظر پاکستان نے نومبر کی ذیلی قومی پولیو ویکسینیشن مہم کامیابی سے مکمل کر لی ہے۔ نیشنل ایمرجنسی آپریشن سینٹر (ای او سی) کے مطابق، 2 سے 8 نومبر تک جاری رہنے والی اس مہم کے دوران ملک کے 97 منتخب اضلاع میں 2 کروڑ 40 لاکھ سے زائد بچوں کو پولیو سے بچاؤ کے قطرے پلائے گئے۔
ایک ہفتے تک جاری رہنے والی اس مہم میں 2 لاکھ سے زائد پولیو ورکرز نے حصہ لیا اور پانچ سال سے کم عمر بچوں کو ویکسین پلائی۔ زیادہ سے زیادہ بچوں تک رسائی یقینی بنانے کے لیے ٹیمیں اسکولوں، سڑکوں کے کنارے، حفاظتی ٹیکوں کے مراکز اور آمد و رفت کے اہم مقامات پر بھی تعینات کی گئیں۔
نیشنل ای او سی کے اعداد و شمار کے مطابق، پنجاب میں سب سے زیادہ 91 لاکھ 96 ہزار سے زائد بچوں کو پولیو سے بچاؤ کے قطرے پلائے گئے۔ صوبے کے 13 منتخب اضلاع میں یہ مہم چلائی گئی۔
سندھ کے 20 اضلاع میں تقریباً 71 لاکھ 4 ہزار بچوں، خیبر پختونخوا کے 27 اضلاع میں 46 لاکھ 97 ہزار جبکہ بلوچستان کے 31 اضلاع میں 22 لاکھ 36 ہزار سے زائد بچوں کو ویکسین دی گئی۔
اسی طرح اسلام آباد میں 4 لاکھ 50 ہزار سے زائد بچوں کو پولیو کے قطرے پلائے گئے، جبکہ گلگت بلتستان کے 3 منتخب اضلاع میں ایک لاکھ 61 ہزار اور آزاد جموں و کشمیر کے 2 اضلاع میں ایک لاکھ 91 ہزار سے زائد بچوں کی ویکسینیشن کی گئی۔
ملک گیر ویکسینیشن مہم کی کامیابی کے باوجود نیشنل ای او سی نے کراچی، کوئٹہ اور پشاور کے بعض علاقوں میں پولیو وائرس کی مسلسل موجودگی اور پھیلاؤ پر تشویش کا اظہار کیا ہے۔ جنوبی خیبر پختونخوا کے اضلاع میں وائرس کی مسلسل منتقلی بھی بچوں کی صحت کے لیے خطرہ بنی ہوئی ہے۔
نیشنل ای او سی کے مطابق، پولیو وائرس کی منتقلی روکنے اور نئے کیسز سے بچاؤ کے لیے مسلسل ویکسینیشن مہمات اور مؤثر نگرانی ناگزیر ہیں۔
ادارے نے والدین پر زور دیا ہے کہ وہ ہر مہم کے دوران پانچ سال سے کم عمر اپنے تمام بچوں کو پولیو سے بچاؤ کے قطرے لازمی پلوائیں اور معمول کے حفاظتی ٹیکوں کا شیڈول بھی بروقت مکمل کروائیں۔
نیشنل ای او سی نے اس عزم کا اعادہ کیا ہے کہ پاکستان سے پولیو کے مکمل خاتمے تک انسدادِ پولیو کی کوششیں جاری رکھی جائیں گی۔
