نیوز ڈیسک
کوہاٹ: خیبر پختونخوا کے ضلع کوہاٹ میں دہشت گردوں اور جرائم پیشہ عناصر کے گٹھ جوڑ سے جاری غیر قانونی گولڈ مائننگ کے خلاف پولیس کے بڑے آپریشن کے دوران دہشت گردوں نے پولیس پارٹی پر حملہ کردیا، جس کے نتیجے میں 8 پولیس اہلکار زخمی ہوگئے۔
ابتدائی اطلاعات کے مطابق واقعہ تھانہ گمبٹ کی حدود میں واقع علاقے دربوکچ میں پیش آیا، جہاں پولیس کی کارروائی کے دوران فتنہ الخوارج سے تعلق رکھنے والے دہشت گردوں نے اہلکاروں پر گھات لگا کر حملہ کیا۔
حملے میں زخمی ہونے والے 8 پولیس اہلکاروں کو فوری طور پر اسپتال منتقل کردیا گیا ہے، جبکہ بعض اہلکاروں کی شہادت کا خدشہ بھی ظاہر کیا جارہا ہے۔
واقعے کی اطلاع ملتے ہی پولیس اور سیکیورٹی فورسز کے اضافی دستے جائے وقوعہ پر پہنچ گئے، جس کے بعد علاقے میں دہشت گردوں اور سیکیورٹی اہلکاروں کے درمیان شدید فائرنگ کا تبادلہ شروع ہوگیا۔
ابتدائی اطلاعات کے مطابق جوابی کارروائی میں متعدد حملہ آوروں کے مارے جانے کی اطلاعات ہیں، جبکہ فرار ہونے والے دہشت گردوں کی تلاش کے لیے سرچ آپریشن جاری ہے۔
ڈی پی او کوہاٹ نے واضح کیا ہے کہ فتنہ الخوارج کے خلاف کارروائی آخری خارجی کے خاتمے تک جاری رہے گی۔
پولیس حکام کے مطابق آپریشن کا بنیادی مقصد دہشت گردوں اور جرائم پیشہ عناصر کے گٹھ جوڑ کے تحت جاری غیر قانونی گولڈ مائننگ کا خاتمہ کرنا ہے۔
علاقے میں امن و امان برقرار رکھنے اور دہشت گردوں کے خلاف کارروائی مؤثر بنانے کے لیے سیکیورٹی فورسز کی مزید نفری بھی تعینات کردی گئی ہے۔
