نیوز ڈیسک
اٹلی :اٹلی کے 300 سے زائد اسکولوں کو بم دھماکوں کی دھمکی آمیز ای میلز موصول ہونے کے بعد ملک بھر میں سیکیورٹی ہائی الرٹ کر دی گئی ہے، جبکہ حفاظتی اقدامات کے تحت متعدد تعلیمی اداروں کو خالی کرا لیا گیا۔ دھمکی آمیز پیغامات میں اطالوی وزیر اعظم جارجیا میلونی کی گاڑی کو بھی بم سے اڑانے کی دھمکی دی گئی تھی۔
یورپ کے مختلف ممالک میں سائبر حملوں اور دھمکی آمیز پیغامات کے ذریعے خوف و ہراس پھیلانے کے واقعات میں اضافے کے درمیان اٹلی کے متعدد شہروں کے تعلیمی اداروں کو نشانہ بنایا گیا ہے۔
برطانوی نشریاتی ادارے بی بی سی کے مطابق روم، نیپلز، وِچینزا، فلورنس، پیسا اور ٹریئسٹے سمیت مختلف شہروں کے 300 سے زائد اسکولوں کو ای میلز موصول ہوئیں، جن میں عمارتوں کو بم دھماکوں سے تباہ کرنے کی دھمکی دی گئی تھی۔
دھمکی آمیز ای میلز میں دعویٰ کیا گیا تھا کہ اسکولوں کی عمارتوں میں طاقتور دھماکا خیز مواد نصب کیا گیا ہے، جسے ریموٹ کنٹرول کے ذریعے دھماکے سے اڑایا جا سکتا ہے۔ پیغامات میں یہ دعویٰ بھی کیا گیا کہ اطالوی وزیر اعظم جارجیا میلونی کی گاڑی کے انجن میں بم نصب کر دیا گیا ہے۔
اٹلی کے وزیر تعلیم جوزپے والڈیتارا نے مقامی ٹی وی سے گفتگو کرتے ہوئے کہا کہ یورپ بھر میں پروازوں، سپر مارکیٹس اور اسپتالوں کو نشانہ بنانے کی دھمکیوں کے واقعات میں ایک مربوط حکمت عملی دکھائی دیتی ہے۔
دوسری جانب وزیر اعظم جارجیا میلونی نے صورت حال کا جائزہ لینے کے لیے وزرا اور انٹیلی جنس اداروں کے سربراہان کا ہنگامی اجلاس طلب کیا۔ انہوں نے سوشل میڈیا پر جاری بیان میں کہا کہ ان دھمکیوں کا بظاہر مقصد عوام میں خوف و ہراس پیدا کرنا ہے۔
واضح رہے کہ گزشتہ ہفتے بھی اٹلی کے ہوائی اڈوں اور یورپ کے دیگر ممالک کی ایئرلائنز کو بم حملوں کی متعدد جعلی دھمکیاں موصول ہوئی تھیں، جن کے نتیجے میں مختلف عمارتیں خالی کرانا پڑیں اور فضائی سفر کا نظام متاثر ہوا تھا۔
ان میں سے بعض دھمکیوں کی ذمہ داری ایک انتہا پسند گروہ نے قبول کی تھی، تاہم بعد ازاں اس گروہ نے ان پیغامات سے کسی بھی قسم کے تعلق کی تردید کر دی تھی۔
رپورٹس کے مطابق بدھ کے روز دھمکی آمیز ای میلز موصول ہونے کے بعد خالی کرائے گئے اسکولوں کو سیکیورٹی کلیئرنس ملنے پر دوبارہ کھول دیا گیا اور تعلیمی سرگرمیاں معمول پر آگئیں۔
اٹلی سے قبل شمالی آئرلینڈ کے 300 سے زائد اسکولوں کو بھی اسی نوعیت کی دھمکی آمیز ای میلز موصول ہوئی تھیں، جبکہ اسکاٹ لینڈ کے متعدد تعلیمی اداروں کو بھی ایسے پیغامات بھیجے گئے تھے۔
