نیوز ڈیسک
اسلام آباد: کرکٹ ٹیموں کی آمدورفت کے پیش نظر اسلام آباد کی ایکسپریس ہائی وے اور سری نگر ہائی وے پر مختلف مقامات پر ٹریفک ڈائیورشنز نافذ کی جائیں گی، جس کے باعث شہریوں کو متبادل راستے اختیار کرنے کی ہدایت کی گئی ہے۔
ترجمان اسلام آباد پولیس کے مطابق سری نگر ہائی وے پر ڈائیورشنز کے دوران شہری سہروردی روڈ، سروس روڈ جی-8، سروس روڈ جی-9 اور زیرو پوائنٹ کا راستہ استعمال کریں۔
فیض آباد جانے والی ٹریفک فیصل ایونیو جبکہ نائنتھ ایونیو جانے والے شہری سروس روڈ ایسٹ استعمال کریں۔ اسی طرح کورال سے اسلام آباد آنے والے شہری پرانا ایئرپورٹ، راول روڈ، مری روڈ، آئی جے پی روڈ اور فقیر ایپی روڈ کے ذریعے اپنی منزل تک پہنچ سکتے ہیں۔
پولیس کے مطابق کورال ایکسپریس ہائی وے، مری روڈ اور کلب روڈ بند ہونے کی صورت میں شہری لہتراڑ روڈ اور پارک روڈ استعمال کریں، جبکہ نیو اسلام آباد ایئرپورٹ اور پشاور روڈ جانے کے لیے جناح ایونیو اور مارگلہ روڈ اختیار کریں۔
بہارہ کہو سے اسلام آباد آنے والے شہریوں کو بنی گالا اور پارک روڈ استعمال کرنے کی ہدایت کی گئی ہے۔
اسلام آباد ٹریفک پولیس کے مطابق ڈائیورشنز کے دوران مختلف شاہراہوں پر ٹریفک کا دباؤ بڑھنے کا امکان ہے، لہٰذا شہری اپنی منزل پر بروقت پہنچنے کے لیے سفر کے دوران 20 سے 25 منٹ اضافی وقت رکھیں۔
چیف ٹریفک آفیسر کائنات اظہر خان نے کہا ہے کہ شہریوں کی سہولت اور ٹریفک کی روانی برقرار رکھنے کے لیے اسلام آباد ٹریفک پولیس کے افسران مختلف مقامات پر موجود ہوں گے۔
شہری ٹریفک کی تازہ ترین صورتحال اور رہنمائی کے لیے ایف ایم 92.4 سنیں یا اسلام آباد پولیس کے سوشل میڈیا پیجز فالو کریں۔
