ٹیکنالوجی کمپنی ایپل نے آئی فون ایکس کو اپنی پروڈکٹ سپورٹ پالیسی کے سب سے محدود درجے ’آبسلیٹ‘ (Obsolete) میں شامل کر دیا ہے۔ اس فیصلے کے بعد ایپل اور اس کے مجاز سروس سینٹرز کی جانب سے اس ڈیوائس کے لیے باضابطہ ہارڈویئر مرمت اور متبادل پرزوں کی فراہمی عام طور پر دستیاب نہیں رہے گی۔
رپورٹس کے مطابق ایپل کی سپورٹ دستاویزات میں آئی فون ایکس کو اب ’آبسلیٹ‘ قرار دیا گیا ہے۔ اس کا مطلب ہے کہ خراب اسکرین، بیٹری یا چارجنگ پورٹ جیسے مسائل کی صورت میں صارفین کو باضابطہ ایپل مرمت حاصل کرنے میں مشکلات پیش آسکتی ہیں۔
ایپل عموماً کسی پروڈکٹ کی آخری بار فروخت کے بعد سات سال سے زائد عرصہ گزرنے پر اسے ’آبسلیٹ‘ قرار دیتا ہے، تاہم حتمی فیصلہ کمپنی کی صوابدید پر ہوتا ہے۔ آئی فون ایکس نومبر 2017 میں متعارف ہوا تھا جبکہ اس کی فروخت ستمبر 2018 میں بند کر دی گئی تھی۔
’آبسلیٹ‘ اسٹیٹس ایپل کے ’ونٹیج‘ درجے سے زیادہ سخت ہے۔ ونٹیج ڈیوائسز کی مرمت بعض صورتوں میں پرزوں کی دستیابی کی بنیاد پر کی جا سکتی ہے۔
آئی فون ایکس کیوں اہم تھا؟
آئی فون ایکس نے ایپل کے اسمارٹ فون ڈیزائن میں ایک بڑی تبدیلی متعارف کرائی تھی۔ یہ ایپل کا پہلا آئی فون تھا جس میں فیس آئی ڈی اور OLED ڈسپلے شامل کیے گئے۔ اس کے ساتھ روایتی ہوم بٹن اور ٹچ آئی ڈی کو ختم کرکے تقریباً کنارے سے کنارے تک پھیلا ہوا نوچ ڈسپلے متعارف کرایا گیا۔
