نیوز ڈیسک
گلگت: شدید برف باری کے باعث تین روز تک بند رہنے والی بابوسر ٹاپ روڈ کو ٹریفک کی آمدورفت کے لیے بحال کر دیا گیا ہے، جس سے سیاحوں اور گلگت بلتستان کے عوام کو سفری سہولت میسر آگئی ہے۔
تفصیلات کے مطابق نیشنل ہائی وے اتھارٹی (این ایچ اے) نے سڑک پر جمع برف ہٹانے کے بعد گلگت بلتستان اور خیبر پختونخوا کی جانب سے بابوسر ٹاپ روڈ کو ٹریفک کے لیے کھول دیا ہے۔
پولیس کے مطابق بابوسر ٹاپ روڈ شام 4 بجے تک ہر قسم کی ٹریفک کے لیے کھلی رہے گی، تاہم موسم کی شدت، دھند اور حدِ نگاہ متاثر ہونے کے خدشے کے پیش نظر شام 4 بجے کے بعد ٹریفک کی آمدورفت بند کر دی جائے گی۔
سڑک کی بحالی سے سیاحوں کو بابوسر ٹاپ کے برف پوش پہاڑوں اور دلکش قدرتی مناظر سے لطف اندوز ہونے کا موقع ملے گا، جبکہ مقامی افراد کی آمدورفت بھی ممکن ہوسکے گی۔
پولیس نے مسافروں اور سیاحوں کو ہدایت کی ہے کہ وہ سفر سے قبل موسم اور سڑک کی تازہ ترین صورت حال سے آگاہی حاصل کریں اور مقررہ اوقات کے اندر سفر مکمل کریں۔
