ملک بھر میں آج سرکارِ دو جہاں حضرت محمد مصطفیٰ ﷺ کا یومِ ولادت، جشنِ میلاد النبی ﷺ مذہبی عقیدت و احترام کے ساتھ منایا جا رہا ہے۔ دن کا آغاز توپوں کی سلامی سے کیا گیا، جبکہ مساجد، گھروں، سرکاری عمارتوں، گلیوں اور بازاروں کو برقی قمقموں اور سبز پرچموں سے سجایا گیا ہے۔
کراچی میں گلی محلوں، چوک چوراہوں اور اہم شاہراہوں کو خوبصورتی سے سجایا گیا ہے۔ مختلف مقامات پر موئے مبارک کی زیارت اور مسجد نبوی ﷺ و خانہ کعبہ کے ماڈلز رکھے گئے ہیں، جبکہ عاشقانِ رسول ﷺ کی جانب سے محافلِ میلاد، نعت خوانی اور ریلیوں کا سلسلہ جاری ہے۔
شہر قائد میں عید میلاد النبی ﷺ کا مرکزی جلوس دوپہر ڈھائی بجے شہید مسجد کھارادر سے برآمد ہوگا، جو نیو میمن مسجد سے ہوتا ہوا گلزارِ حبیب مسجد پر عصر کے وقت اختتام پذیر ہوگا۔
اسلام آباد میں بھی جشنِ آمدِ رسول ﷺ کے سلسلے میں شہر کو خوبصورتی سے سجایا گیا ہے۔ مختلف مساجد میں خصوصی عبادات، محافلِ نعت اور میلاد کا اہتمام کیا جا رہا ہے، جبکہ درود و سلام اور جشنِ آمدِ رسول ﷺ کے نعروں سے فضا گونج رہی ہے۔
لاہور میں بھی جشنِ میلاد النبی ﷺ کے سلسلے میں مساجد، گھروں، سڑکوں اور سرکاری عمارتوں کو سجایا گیا ہے۔ مختلف مقامات پر تقریبات اور محافل کا انعقاد کیا جا رہا ہے، جبکہ ملک کی ترقی، خوشحالی اور سلامتی کے لیے خصوصی دعائیں بھی کی جا رہی ہیں۔ لاہور کا مرکزی جلوس ریلوے اسٹیشن چوک سے برآمد ہوگا۔
پشاور میں بھی نبی کریم ﷺ سے محبت و عقیدت کے اظہار کے لیے نعت خوانی اور محافلِ میلاد کا انعقاد کیا جا رہا ہے۔ ملک بھر میں جشنِ میلاد النبی ﷺ کے موقع پر امن، سلامتی، ترقی اور خوشحالی کے لیے خصوصی دعائیں بھی کی جا رہی ہیں
