وزیراعظم ہاؤس میں ہونے والے اہم اجلاس میں آزاد کشمیر کے نئے وزیراعظم کے نام پر اتفاق نہ ہوسکا، جبکہ ٹیکنو کریٹ نشست پر منتخب ہونے والے افتخار گیلانی کو وزیراعظم نامزد کرنے کی تجویز پر اختلافات سامنے آگئے اطلاعات کے مطابق اجلاس میں آزاد کشمیر کے وزیراعظم کے انتخاب کے حوالے سے مختلف ناموں پر غور کیا گیا، تاہم کسی ایک امیدوار پر اتفاق رائے پیدا نہ ہوسکا۔ ذرائع کا کہنا ہے کہ پہلے سے نامزد وزیراعظم شاہ غلام قادر کو صدر آزاد کشمیر کے عہدے کی پیشکش بھی کی گئی، تاہم انہوں نے یہ پیشکش قبول کرنے سے انکار کردیا اور اجلاس سے اٹھ کر چلے گئے۔ذرائع کے مطابق شاہ غلام قادر اور سابق وزیراعظم آزاد کشمیر راجا فاروق حیدر نے پارلیمانی پارٹی کا اجلاس بلانے کا مطالبہ کیا ہے۔ وزیراعظم کے نام پر اتفاق نہ ہونے کے باعث آزاد کشمیر قانون ساز اسمبلی کا اجلاس بھی ملتوی کردیا گیا۔ذرائع کا کہنا ہے کہ آزاد کشمیر کے وزیراعظم کے انتخاب کے لیے آئندہ اجلاس کل جمعہ کو ہوگا، جس میں معاملے کو دوبارہ زیر غور لایا جائے گا۔دوسری جانب شاہ غلام قادر نے اپنے مؤقف میں کہا ہے کہ وہ عوام کی عزت اور وقار پر کوئی سمجھوتہ نہیں کریں گے۔ ان کا کہنا تھا کہ نواز شریف کے نعرے ’’ووٹ کو عزت دو‘‘ کو یقینی بنایا جائے گا۔ادھر مسلم لیگ ن کے رہنما رانا ثنا اللہ نے کہا ہے کہ آزاد کشمیر کے انتخابات شفاف ہوئے ہیں اور پیپلز پارٹی کے تحفظات دور کرنے کے لیے تیار ہیں۔ وزیراعظم آزاد کشمیر کے انتخاب پر جاری مشاورت کے باعث سیاسی حلقوں میں بھی صورتحال پر گہری نظر رکھی جا رہی ہے
