نیوز ڈیسک
اسلام آباد: وفاقی تحقیقاتی ادارے (ایف آئی اے) امیگریشن نے اسلام آباد انٹرنیشنل ایئرپورٹ پر کارروائی کرتے ہوئے مبینہ جعلی تعلیمی اسناد کے ذریعے روس اسٹڈی ویزے پر جانے والے ایک مسافر کو آف لوڈ کر دیا، جبکہ واقعے کا مقدمہ درج کرکے مزید تفتیش شروع کر دی گئی ہے۔
ایف آئی اے اسلام آباد زون کے مطابق، امیگریشن حکام نے مسافر کی دستاویزات کی جانچ پڑتال کے دوران اس کے میٹرک سرٹیفکیٹ اور تفصیلی نمبرز سرٹیفکیٹ پر درج بار کوڈ کی تصدیق کی۔ تاہم، انٹر بورڈز کوآرڈینیشن کمیشن (IBCC) اور وزارتِ خارجہ (MOFA) سے ان دستاویزات کی تصدیق کا ریکارڈ دستیاب نہ ہونے پر انہیں مشتبہ قرار دیا گیا۔
ابتدائی تفتیش کے دوران مسافر نے بتایا کہ تعلیمی اسناد اسے فراہم کی گئی تھیں، جبکہ روس کے اسٹڈی ویزے اور فضائی ٹکٹ کا انتظام ایک ایجنٹ کے ذریعے کیا گیا تھا۔
ایف آئی اے کے مطابق، واقعے کے سلسلے میں اینٹی کرپشن سرکل اسلام آباد میں مقدمہ درج کر لیا گیا ہے، جبکہ معاملے کی مزید تحقیقات جاری ہیں۔ تفتیش کے دوران دیگر ممکنہ ملوث افراد کے کردار کا بھی تعین کیا جائے گا۔
یہ کارروائی ایڈیشنل ڈائریکٹر انچارج شفٹ سی، سید کاشف علی کی نگرانی میں عمل میں لائی گئی۔ کارروائی کرنے والی ٹیم میں ایف سی نعیم اللہ اور ایف سی حسن نثار شامل تھے، جبکہ مقدمے کی تفتیش سب انسپکٹر شازیہ نورین کے سپرد کی گئی ہے۔
ایف آئی اے اسلام آباد زون نے واضح کیا ہے کہ جعلی دستاویزات اور غیر قانونی طریقوں سے بیرونِ ملک سفر کی کوششوں کی روک تھام کے لیے کارروائیاں جاری رہیں گی اور ملوث عناصر کے خلاف قانون کے مطابق کارروائی کی جائے گی۔
