نیوز ڈیسک
راولپنڈی: پاکستان نے سری لنکا کے خلاف تین میچوں کی ٹی ٹوئنٹی سیریز کے تیسرے اور آخری مقابلے میں 12 اوورز کے اختتام پر 5 وکٹوں کے نقصان پر 85 رنز بنا لیے ہیں۔ راولپنڈی میں کھیلے جا رہے میچ میں میزبان ٹیم سیریز میں کلین سویپ مکمل کرنے کے لیے میدان میں اتری ہے۔
سری لنکن کپتان کوشل مینڈس نے ٹاس جیت کر پہلے فیلڈنگ کا فیصلہ کیا اور پاکستانی ٹیم کو بیٹنگ کی دعوت دی۔ پاکستان کی قیادت صاحبزادہ فرحان کر رہے ہیں۔
ٹاس کے بعد گفتگو کرتے ہوئے پاکستانی کپتان صاحبزادہ فرحان نے کہا کہ ٹیم نے گزشتہ میچ میں بھی پہلے بیٹنگ کی تھی اور کھلاڑی اپنی کارکردگی سے مطمئن ہیں۔ ان کا کہنا تھا کہ ٹیم پُراعتماد ہے اور اچھا کھیل پیش کرنے کی کوشش کرے گی۔
دوسری جانب سری لنکن کپتان کوشل مینڈس نے آخری میچ میں کامیابی حاصل کرنے کے عزم کا اظہار کیا۔ انہوں نے گزشتہ دونوں مقابلوں میں پاور پلے کے دوران پیش آنے والی مشکلات کا اعتراف کرتے ہوئے کہا کہ ٹیم بہتر کارکردگی دکھانے کی کوشش کرے گی
پاکستان نے تیسرے ٹی ٹوئنٹی کے لیے اپنی پلیئنگ الیون میں چار تبدیلیاں کی ہیں۔ عرفات منہاس، عبدالصمد، صوفیان مقیم اور رضا اللہ کو ٹیم میں شامل کیا گیا ہے، جبکہ صائم ایوب، نسیم شاہ، ابرار احمد اور شاداب خان اس میچ میں حصہ نہیں لے رہے۔
پاکستان کی پلیئنگ الیون
صاحبزادہ فرحان (کپتان)، فخر زمان، معاذ صداقت، حسن نواز، عبدالصمد، خواجہ نافع، عرفات منہاس، محمد عمران، رضا اللہ، سلمان مرزا اور صوفیان مقیم۔
سری لنکا کی پلیئنگ الیون
کوشل مینڈس (کپتان)، لہیرو اودارا، سینیٹھ جے وردنے، کامینڈو مینڈس، سہان اراچیگے، داسن شناکا، چمینڈو وکرما سنگھے، وجے کانت ویاسکانت، ایشان مالنگا، بنورا فرنینڈو اور نوان تھشارا۔
پاکستان ابتدائی دونوں میچ جیت کر تین میچوں کی سیریز پہلے ہی اپنے نام کر چکا ہے۔ میزبان ٹیم نے پہلے ٹی ٹوئنٹی میں چار وکٹوں سے کامیابی حاصل کی، جبکہ دوسرے مقابلے میں سری لنکا کو 82 رنز سے شکست دی تھی۔
پاکستان کی نظریں آخری میچ میں کامیابی حاصل کرکے سیریز میں 3-0 سے کلین سویپ مکمل کرنے پر مرکوز ہیں، جبکہ سری لنکن ٹیم آخری مقابلہ جیت کر وائٹ واش سے بچنے اور سیریز کا اختتام فتح کے ساتھ کرنے کی خواہاں ہے۔
