نیوز ڈیسک
ملتان: رحمان بابا ایکسپریس کو ملتان میں پیش آنے والے حادثے کی ابتدائی مشترکہ تحقیقاتی رپورٹ میں اہم انکشافات سامنے آئے ہیں، جس کے مطابق ٹرین کی دوسری بوگی کے نیچے لٹکا ہوا ایک پرزہ حادثے کی وجہ بنا۔
ریلوے ذرائع کے مطابق بوگی کے ٹرس بار ہینگر کا ایک حصہ ریلوے کراسنگ کے بلاک سے ٹکرا کر اس میں پھنس گیا، جس کے باعث بوگی کا ایک پہیہ ریلوے ٹریک پر چڑھ گیا اور ٹرین کی 14 بوگیاں پٹری سے اتر گئیں۔
ذرائع کا کہنا ہے کہ جائے حادثہ سے ٹرس بار ہینگر کا باقی حصہ بھی برآمد کرلیا گیا ہے، جبکہ بوگی کے دیگر پرزے بھی ریلوے کراسنگ میں پھنسے ہوئے پائے گئے ہیں۔
ابتدائی معلومات کے مطابق رحمان بابا ایکسپریس صبح 5 بجے 672 ٹن وزن کے ساتھ روانہ ہوئی تھی۔ ٹرین کا انجن اور سامان لے جانے والی وین ریلوے کراسنگ سے بحفاظت گزر گئے، تاہم دوسری بوگی کے نیچے موجود پرزہ کراسنگ میں پھنسنے کے بعد حادثہ پیش آیا۔
ریلوے ذرائع کے مطابق حادثے کے نتیجے میں ریلوے کے مختلف شعبوں کو پہنچنے والے نقصان کا تخمینہ لگانے کا عمل جاری ہے۔ ابتدائی مشترکہ تحقیقاتی رپورٹ میں سامنے آنے والے شواہد کی روشنی میں حادثے کی وجوہات کا جائزہ لیا جا رہا ہے۔
