اسلام آباد:بالی ووڈ کی معروف ڈانسر و اداکارہ ملائکہ اروڑا کے والد کی مبینہ خودکشی کے بعد ان کی بیٹیوں کے ساتھ آخری فون کال کی گفتگو منظرِ عام پر آ گئی ہے۔
بھارتی میڈیا کے مطابق، گزشتہ روز صبح ممبئی کے باندرہ علاقے میں واقع اپارٹمنٹ کی چھٹی منزل سے اداکارہ کے والد انیل کلدیپ مہتا نے مبینہ طور پر چھلانگ لگا کر خودکشی کر لی۔
والد کی اچانک موت نے ملائکہ اور ان کے خاندان کو شدید صدمے میں مبتلا کر دیا ہے۔
اداکارہ نے انسٹاگرام پر اپنے والد کی وفات کی اطلاع دیتے ہوئے لکھا کہ ہمیں اپنے پیارے والد انیل مہتا کی موت کا اعلان کرتے ہوئے گہرے دکھ کا سامنا ہے۔وہ ایک نرم دل انسان، شاندار نانا، پیار کرنے والے شوہر، اور بہترین دوست تھے۔
خاندان نے اس وقت گہرے صدمے میں ہونے کا اظہار کیا ہے اور اس مشکل وقت میں میڈیا اور خیر خواہوں سے رازداری کی درخواست کی ہے، جبکہ ان کی حمایت اور احترام کی قدر کی گئی ہے۔
65 سالہ انیل مہتا کی وفات کے بعد مزید تفصیلات سامنے آ رہی ہیں۔ ڈانسر کی والدہ اور مرحوم کی اہلیہ، جوائس پولی کے مطابق، بدھ کی صبح 9 بجے کے قریب انہوں نے اپنے شوہر کی چپل گھر میں دیکھی اور انہیں تلاش کرنا شروع کیا۔
جب شوہر گھر میں نہیں ملے، تو انہوں نے بالکونی سے باہر دیکھ کر اپارٹمنٹ میں ہنگامہ اور شور شرابا دیکھا۔ایک سیکیورٹی گارڈ مدد کے لیے چیخ رہا تھا، جس سے انہیں اندازہ ہوا کہ کچھ غیر معمولی ہو رہا ہے۔
میڈیا رپورٹس کے مطابق، انیل مہتا نے مبینہ طور پر بالکونی سے چھلانگ لگانے سے پہلے اپنی دونوں بیٹیوں کو فون کر کے واپس بلایا اور کہا کہ وہ تھک گیا ہے۔
یہ بھی معلوم ہوا ہے کہ جب انیل مہتا کا انتقال ہوا، ملائکہ اڑورا شہر میں موجود نہیں تھیں بلکہ پونے میں کام کے سلسلے میں تھیں۔
