اسلام آباد:پاکستان ٹیلی کام کمپنی (پی ٹی سی ایل) نے ڈیجیٹل اور ٹیلی کام نظام کی بہتری کے لیے ایک اہم قدم اٹھایا ہے اور پاکستان کو افریقہ-1 سب میرین کیبل سسٹم سے منسلک کردیا ہے۔
افریقہ-1 سب میرین کیبل سسٹم سے پاکستان کا لنک
پی ٹی سی ایل نے پاکستان کے ڈیجیٹل اور ٹیلی کام کے نظام کو بہتر بنانے کے لیے ملک کو افریقہ-1 سب میرین کیبل سسٹم سے جوڑا ہے۔ یہ سب میرین کیبل پاکستان کے کراچی میں پی ٹی سی ایل ایکسچینج سے منسلک کی گئی ہے۔
باضابطہ معاہدہ اور کنسورشیم میں شمولیت
پی ٹی سی ایل نے افریقہ-1 کیبل سسٹم کنسورشیم میں شمولیت کے لیے باضابطہ معاہدہ کیا ہے۔ اس اقدام کا مقصد عالمی ڈیجیٹل مراکز کے ساتھ پاکستان کے روابط کو مزید مستحکم کرنا اور ملکی ٹیلی کمیونی کیشن ڈھانچے کو بہتر بنانا ہے۔
مزید پرئیے:https://urdu.thepenpk.com/?p=6276
افریقہ-1 کیبل سسٹم کی خصوصیات کیا ہیں؟
افریقہ-1 کیبل سسٹم تقریباً دس ہزار کلومیٹر طویل ہے اور اس میں جدید ترین ٹیکنالوجیز شامل ہیں۔
یہ سسٹم پاکستان کو سعودی عرب، متحدہ عرب امارات، مصر، سوڈان، الجیریا، فرانس، کینیا، اور جبوتی جیسے اسٹریٹجک اہمیت کے حامل ممالک سے جوڑے گا۔
پی ٹی سی ایل کا ڈیجیٹل وژن 2030
پی ٹی سی ایل گروپ کے نائب صدر برائے انٹرنیشنل بزنس، سید محمد شعیب نے کہا کہ افریقہ-1 کیبل سسٹم میں ہماری شرکت پاکستان کے ’ڈیجیٹل وژن 2030‘ کے عین مطابق ہے۔
ان کا کہنا تھا کہ پی ٹی سی ایل کا مقصد ڈیجیٹل تقسیم کا خاتمہ کرکے لوگوں کو بااختیار بنانا اور مختلف شعبوں میں جدت کو فروغ دینا ہے تاکہ ملکی معیشت مستحکم ہو سکے۔
عالمی معیار کی انٹرنیٹ سہولتیں
سید محمد شعیب نے مزید کہا کہ افریقہ-1 کیبل سسٹم دو ہزار چھبیس کے اوائل میں فعال ہو جائے گا، جس کے بعد پاکستان کے صارفین کو عالمی معیار کی انٹرنیٹ سہولتیں دستیاب ہوں گی۔
