نیوزڈیسک
کراچی: کراچی میں جشنِ آزادی اور “معرکہ حق” کی مناسبت سے خصوصی آزادی ٹرین کا افتتاح کر دیا گیا۔
سینئر وزیر سندھ شرجیل انعام میمن نے کینٹ اسٹیشن پر فیتہ کاٹ کر ٹرین کا افتتاح کیا اور جشنِ آزادی کا کیک بھی کاٹا۔
اس موقع پر شرجیل میمن کا کہنا تھا کہ کلچر ڈپارٹمنٹ کی جانب سے ڈیزرٹ ٹرین پہلے ہی چل رہی ہے جبکہ خصوصی آزادی ٹرین عوام کے لیے مفت چلائی جا رہی ہے۔
انہوں نے کہا کہ جشنِ آزادی کے ساتھ ساتھ “معرکہ حق” کی کامیابی بھی جوش و خروش سے منائی جا رہی ہے، جہاں ہماری فورسز نے بھارت کو شکست دے کر اس کے غرور کو توڑ دیا۔
شرجیل میمن نے مزید کہا کہ ہمیں اختلافات بھلا کر متحد ہو کر چیلنجز کا مقابلہ کرنا ہوگا۔
سندھ حکومت ہمیشہ عوام کے مسائل حل کرنے کے لیے عملی اقدامات کرتی رہی ہے۔ ان کے مطابق بلاول بھٹو زرداری نے نریندر مودی جیسے دہشت گرد کا اصل چہرہ دنیا کے سامنے بے نقاب کیا ہے اور آج خود بھارتی عوام بھی مودی پر تنقید کر رہی ہے۔
اسی دوران، گورنر ہاؤس سندھ میں دنیا کی طویل ترین آتش بازی کا نیا عالمی ریکارڈ قائم ہوا، جو ایک گھنٹہ سولہ منٹ تک جاری رہا۔
یہ شاندار مظاہرہ جشنِ آزادی اور “معرکہ حق” کے سلسلے کی تقریبات کا حصہ تھا۔
گورنر سندھ نے کہا کہ یہ ریکارڈ نریندر مودی کو دکھانے کے لیے بنایا گیا تاکہ اسے دنیا بھر میں رسوا کیا جا سکے۔
ایم کیو ایم پاکستان کے رہنما خالد مقبول صدیقی نے مزاحیہ انداز میں کہا کہ ہم نے آتش بازی میں دنیا کا ریکارڈ توڑ دیا اور بھارت کو بھی سمجھ آ گئی کہ اتنی طویل آتش بازی آتش فشاں میں بدل سکتی ہے۔
