نیوزڈیسک
اسلام آباد: پاکستان پیپلز پارٹی کے چیئرمین بلاول بھٹو زرداری نے کہا کہ پاکستانی عوام میں اتنی ہمت اور طاقت ہے کہ وہ نہ صرف جنگ میں بھارت کا مقابلہ کر سکتے ہیں بلکہ چھ کے چھ دریا واپس لینے کی صلاحیت بھی رکھتے ہیں۔
ان کا کہنا تھا کہ اگر ہمیں مجبور کیا گیا تو ہم نہ پیچھے ہٹیں گے اور نہ جھکیں گے۔
بلاول بھٹو بھٹ شاہ میں شاہ عبداللطیف بھٹائی کے عرس میں شرکت کے لیے پہنچے، جہاں وزیراعلیٰ سندھ مراد علی شاہ، سینئر صوبائی وزیر شرجیل انعام میمن اور نثار کھوڑو بھی ان کے ہمراہ تھے۔ وزیر ثقافت ذوالفقار علی شاہ نے ان کا استقبال کیا۔ عرس کے موقع پر ایوارڈز کی تقریب میں بلاول بھٹو نے شرکت کی، جہاں لوک اور صوفی فنکاروں نے کلام پیش کیے۔
تقریب سے خطاب میں بلاول نے کہا کہ بھارت کے ساتھ جنگ پاکستان نے شروع نہیں کی، بلکہ بھارت نے جنگ مسلط کی، مگر پوری قوم نے متحد ہو کر وطن کا دفاع کیا۔ نوجوانوں نے سوشل میڈیا پر بھرپور جواب دیا جبکہ افواج پاکستان نے میدانِ جنگ میں بھارت کو عبرتناک شکست دی۔
انہوں نے کہا کہ اس شکست کے بعد بھارت نے ایک اور بزدلانہ وار سندھ طاس معاہدے پر کیا، جو دراصل دریائے سندھ پر سب سے بڑا حملہ ہے۔
بھارت یکطرفہ طور پر یہ معاہدہ ختم نہیں کر سکتا۔ دریائے سندھ محض پانی کا ذریعہ نہیں، بلکہ سندھ کی ہزاروں سالہ تاریخ اور ثقافت کا حصہ ہے۔
انہوں نے مزید کہا کہ مودی کا یہ اقدام ہماری تہذیب، تاریخ اور ثقافت پر حملہ ہے، جس کی مخالفت نہ صرف پاکستانی عوام بلکہ بھارتی عوام بھی کر رہے ہیں۔
بطور وزیر خارجہ نے مودی کو عالمی سطح پر بے نقاب کیا اور دنیا بھر میں پاکستان کا مقدمہ لڑا، امریکہ اور یورپ سمیت مختلف فورمز پر سندھ طاس معاہدے کے خلاف آواز بلند کی۔
بلاول بھٹو نے کہا کہ ہمیں متحد ہو کر مودی کے ان عزائم کو ناکام بنانا ہوگا۔ انہوں نے یقین ظاہر کیا کہ اگر بھارت نے جنگ مسلط کی تو پاکستان کے ہر صوبے کے عوام اس کا مقابلہ کرنے کے لیے تیار ہیں اور یہ ایسی جنگ ہوگی کہ جس میں بھارت کو لازمی شکست ہوگی۔
