نامہ نگار
لاہور: ریلوے لائن کے قریب پنجاب کالج کے پاس افسوسناک واقعہ پیش آیا، جہاں ایک بھائی نے اپنی 16 سالہ بہن کو مبینہ طور پر غیرت کے نام پر قتل کردیا۔
ذرائع کے مطابق مقتولہ اپنی پسند سے شادی کرنا چاہتی تھی، جس پر گھر میں شدید تنازعہ پیدا ہوا۔ اسی دوران بھائی نے طیش میں آکر بہن کی جان لے لی۔ واقعہ صبح تقریباً 9 بجے پیش آیا۔ واردات کے بعد ملزم موقع سے فرار ہوگیا۔
واقعہ کے بعد مقتولہ کے ورثاء نے نعش سڑک پر رکھ کر شدید احتجاج کیا، تاہم والد نے احتجاج روکنے اور معاملہ دبانے کی کوشش کی۔ عینی شاہدین کا دعویٰ ہے کہ واردات کے بعد والد نے بیٹے کو خود بھگا دیا، جس سے شبہ مزید گہرا ہوگیا کہ یہ قتل والد اور بیٹے کی ملی بھگت کا نتیجہ ہوسکتا ہے۔
اہل علاقہ کا کہنا ہے کہ واقعے کو دبانے کی کوشش کی جا رہی ہے جس پر عوام میں شدید غم و غصہ پایا جاتا ہے۔ اطلاع ملنے پر پولیس موقع پر پہنچی، شواہد اکٹھے کیے اور تحقیقات کا آغاز کردیا، تاہم کئی گھنٹے گزرنے کے باوجود ملزم کو گرفتار نہیں کیا جاسکا۔
مقامی افراد نے مطالبہ کیا ہے کہ ملزم کو فوری طور پر گرفتار کرکے قرار واقعی سزا دی جائے تاکہ آئندہ ایسے دلخراش واقعات کی روک تھام ممکن ہو سکے۔
