نیوزڈیسک
لاہور: لاہور کی انسدادِ دہشت گردی عدالت (اے ٹی سی) نے بانی پی ٹی آئی عمران خان کی ہمشیرہ علیمہ خان کے دوسرے بیٹے شیر شاہ کو بھی جناح ہاؤس حملہ کیس میں ضمانت دے دی۔
ڈان نیوز کے مطابق اے ٹی سی کے جج منظر علی گل نے محفوظ فیصلہ سناتے ہوئے شیر شاہ کی ضمانت منظور کرلی اور رہائی کا حکم دے دیا۔ پولیس نے انہیں جناح ہاؤس کیس میں گرفتار کیا تھا۔
سماعت کے دوران شیر شاہ کے وکیل رانا مدثر عمر ایڈوکیٹ نے مؤقف اختیار کیا کہ ابھی تک ملزم کے خلاف چالان جمع نہیں ہوا اور نہ ہی کوئی ٹھوس ثبوت ریکارڈ پر موجود ہے۔
انہوں نے کہا کہ شیر شاہ کی گرفتاری اٹھائیس ماہ بعد محض سیاسی انتقام کے تحت عمل میں لائی گئی۔
وکیل کے مطابق شیر شاہ کسی ہنگامہ آرائی یا توڑ پھوڑ میں ملوث نہیں تھا، اور ایسے کئی ملزمان جن پر زیادہ سنگین الزامات تھے، انہیں پہلے ہی ضمانت مل چکی ہے۔
ان کا کہنا تھا کہ شیر شاہ سے ڈنڈے کی پلانٹڈ ریکوری کرائی گئی، جبکہ شریک ملزم کے بیان پر اس کیس میں ڈاکٹر یاسمین راشد کو پہلے ہی ڈسچارج کیا جا چکا ہے۔
عدالت نے دلائل سننے کے بعد شیر شاہ کی ایک لاکھ روپے کے ضمانتی مچلکوں کے عوض ضمانت منظور کرلی۔
واضح رہے کہ گزشتہ روز بھی اے ٹی سی نے علیمہ خان کے دوسرے بیٹے شاہ ریز خان کی ضمانت منظور کی تھی۔
شاہ ریز کو چند روز قبل پولیس نے اغوا کے الزام کی خبروں کے بعد گرفتار کرنے کی تصدیق کی تھی۔ وہ بھی نو مئی دو ہزار تئیس کے مقدمات میں نامزد ہیں۔
