نیوزڈیسک
اسلام آباد: روسی صدر ولادیمیر پیوٹن سے ملاقات کے بعد شمالی کوریائی حکام نے ملکی سربراہ کم جونگ ان کے چھونے والی تمام اشیاء کو احتیاطاً صاف کر دیا۔ روئٹرز کی رپورٹ کے مطابق، کم جونگ ان اور پیوٹن کے درمیان بڑھتی ہوئی دوستی کے باوجود، ملاقات کے دوران غیر معمولی حفاظتی اقدامات کیے گئے۔
کریملن کے رپورٹر الیگزینڈر یوناشیف نے ٹیلی گرام پر ویڈیو شیئر کی جس میں دیکھا جا سکتا ہے کہ کم جونگ ان کے دو عملے کے ارکان بیجنگ کے کمرے کو احتیاط سے صاف کر رہے ہیں، جہاں دونوں رہنما دو گھنٹے سے زائد ملاقات کر رہے تھے۔ کرسی کی پشت اور بازو، کافی ٹیبل اور پانی کے گلاس کو بھی صاف کیا گیا۔ رپورٹر کے مطابق ملاقات ختم ہونے کے بعد عملے نے کم جونگ ان کی موجودگی کے تمام نشانات مٹائے۔
بعد ازاں، دونوں رہنما چائے پینے روانہ ہوئے اور گرمجوشی کے ساتھ رخصت ہوئے۔ جاپانی اخبار نیکی نے جنوبی کوریا اور جاپان کی انٹیلی جنس ایجنسیوں کے حوالے سے رپورٹ کیا کہ کم جونگ ان اپنی موجودگی کو خفیہ رکھنے کے لیے اکثر ذاتی ٹرین میں اپنا بیت الخلا بھی ساتھ لے جاتے ہیں۔
