نیوز ڈیسک
اسلام آباد: یومِ فضائیہ کے موقع پر صدرِ مملکت آصف علی زرداری نے اپنے پیغام میں کہا کہ پاک فضائیہ نے معرکۂ حق، آپریشن بنیان المرصوص میں فیصلہ کن کردار ادا کیا۔ ان کا کہنا تھا کہ 1965ء کی جنگ میں پاک فضائیہ نے شجاعت اور بہادری کی لازوال تاریخ رقم کی اور ہر دور میں اپنی پیشہ ورانہ مہارت اور جرات مندی کا عملی مظاہرہ کیا۔ صدر نے مزید کہا کہ فضائیہ نے ہمیشہ ملک کی فضائی حدود اور سالمیت کا دفاع کیا ہے جبکہ اس کی جدید صلاحیتیں قومی دفاع کی مضبوط ضمانت ہیں۔
وزیراعظم شہباز شریف نے اپنے پیغام میں کہا کہ پوری قوم کو پاک فضائیہ کے جوانوں کی جرات اور صلاحیتوں پر فخر ہے۔ انہوں نے کہا کہ آپریشن بنیان المرصوص میں پاک فضائیہ نے دشمن کو چاروں شانے چت کر کے دنیا کو حیران کر دیا۔ وزیراعظم کے مطابق فضائیہ کی ناقابلِ تسخیر اور کثیر الجہتی صلاحیتیں ان کی پیشہ ورانہ جدت اور عزم کی آئینہ دار ہیں۔
وزیراعلیٰ پنجاب مریم نواز شریف نے بھی یوم فضائیہ پر اپنے پیغام میں پاک فضائیہ کے شاہینوں کو زبردست خراجِ تحسین پیش کیا۔ انہوں نے کہا کہ قوم کو اپنے ان جانباز پائلٹوں پر فخر ہے جنہوں نے ہمیشہ قربانی اور بہادری کی نئی مثالیں قائم کیں۔ وزیراعلیٰ نے مزید کہا کہ 7 ستمبر 1965ء پاک فضائیہ کی تاریخ کا روشن باب ہے، اور شاہین صفت پائلٹوں نے دشمن کے جدید رافیل طیارے گرا کر ایک بار پھر اپنی مہارت اور جرات کو ثابت کیا۔
