نیوزڈیسک
اسلام آباد: وزیراعظم شہباز شریف نے راولپنڈی اور اسلام آباد کے سنگم پر واقع ٹی چوک فلائی اوور کے تعمیراتی منصوبے کا سنگِ بنیاد رکھ دیا۔
ڈیڑھ ارب روپے کی لاگت سے شروع ہونے والا یہ منصوبہ ایک سو پچاس دن (تقریباً پانچ ماہ) میں مکمل کیا جائے گا۔
سنگِ بنیاد رکھنے کی تقریب سے خطاب کرتے ہوئے شہباز شریف نے کہا کہ ایک کلومیٹر طویل اور 11.30 میٹر چوڑا یہ فلائی اوور ایکسپریس ہائی وے سمیت وفاقی دارالحکومت کو گرد و نواح کے علاقوں سے جوڑنے میں اہم کردار ادا کرے گا اور ٹریفک کے بہاؤ کو بہتر بنانے میں سنگِ میل ثابت ہوگا۔
منصوبے میں اسٹریٹ لائٹس اور ہارٹیکلچر کے بھی خصوصی انتظامات کیے جائیں گے۔
وزیراعظم کا کہنا ہے کہ اسلام آباد اور راولپنڈی کے درمیان پہلے سے موجود ریلوے لائن کو استعمال کرتے ہوئے دونوں شہروں کے مسافروں کے لیے ریل سروس شروع کرنے کی منصوبہ بندی کی جا رہی ہے۔
انہوں نے وزارت ریلوے کو ہدایت دی کہ شہریوں کو جدید، مؤثر اور آسان سفری سہولت فراہم کرنے کے لیے جامع منصوبہ تیار کیا جائے۔
وزیراعظم کا مزید کہنا ہے کہ اس سے قبل میٹرو بس سروس، نئی بسیں اور الیکٹرک ٹرانسپورٹ جیسی سہولیات فراہم کی جا چکی ہیں اور ریل سروس ان سہولیات میں مزید بہتری کا باعث بنے گی۔
اس موقع پر وزیر داخلہ محسن نقوی نے بتایا کہ منصوبے کو مقررہ ایک سو پچاس دنوں میں مکمل کرنے کے لیے الگ الگ تکنیکی ٹیمیں تشکیل دی گئی ہیں تاکہ معیار کو ہر صورت یقینی بنایا جا سکے۔
مزید برآں شہباز شریف نے اعلان کیا کہ شنگھائی تعاون تنظیم (SCO) کا آئندہ اجلاس پاکستان میں منعقد ہوگا، جس کے لیے فوری طور پر تیاریوں کا آغاز کرنے، رہائش کے انتظامات اور اسلام آباد کو مزید خوبصورت بنانے کی ہدایت جاری کی گئی ہے۔
