ظریف بلوچ
جیوانی: انسانوں کے اپنے بچوں کے لیے جذبات تو آپ نے دیکھے ہوں گے، لیکن کیا کبھی کسی جانور کو اپنے بچے کے لیے تڑپتے ہوئے دیکھا ہے؟
حال ہی میں بلوچستان کے جیوانی ساحل کے قریب ایک انڈین ہمپ بیک ڈولفن (Indian Humpback Dolphin) کے بچے کی لاش پانی میں دیکھی گئی، جبکہ دیگر ڈولفنیں مسلسل اس کے قریب موجود رہیں اور لاش کو ساحل کی جانب دھکیلتی رہیں۔
مقامی ماہی گیر ساجد عمر کے مطابق، یہ ڈولفنیں ایسا رویّہ اختیار کیے ہوئے تھیں گویا وہ اب بھی بچے کی حفاظت یا مدد کرنے کی کوشش کر رہی ہوں.
تحقیق سے پتہ چلا کہ سائنسی طور پر اس طرزِ عمل کو Epimeletic Behavior یا Post-mortem Care کہا جاتا ہے، جس میں ڈولفنیں یا وہیلیں زخمی یا مردہ فرد، خصوصاً بچے، کے ساتھ رہتی ہیں یا اسے سہارا دیتی ہیں۔
یہ واقعہ سیٹیسینز (Cetaceans) میں پائے جانے والے مضبوط سماجی روابط اور ممکنہ طور پر غم سے مشابہ جذباتی ردِعمل کی ایک نمایاں مثال ہے، جو ساحلی سمندری ماحول کے تحفظ کی فوری ضرورت کو مزید واضح کرتا ہے۔
