کہوٹہ میں 11 سالہ بچی سے مبینہ زیادتی، ایک خاتون سمیت تین افراد گرفتار

راولپنڈی: کہوٹہ کے علاقے میں 11 سالہ بچی سے مبینہ زیادتی کے واقعے کا سی پی او راولپنڈی سید خالد ہمدانی نے نوٹس لیتے ہوئے کہوٹہ پولیس کو فوری اور مؤثر کارروائی کی ہدایت کی۔ پولیس نے جدید ٹیکنالوجی کی مدد سے ایک خاتون سمیت تین مشتبہ افراد کو گرفتار کر لیا ہے۔
پولیس کے مطابق متاثرہ بچی زیرِ حراست خاتون کے گھر مقیم تھی۔ بچی کا میڈیکل معائنہ مکمل کر لیا گیا ہے جبکہ میڈیکل رپورٹ موصول ہونے کے بعد مزید قانونی کارروائی کی جائے گی۔
مقدمے کی تفتیش سینئر افسران کی براہِ راست نگرانی میں جاری ہے اور زیرِ حراست افراد کے خلاف شواہد اکٹھے کیے جا رہے ہیں۔ پولیس حکام کے مطابق کیس کو میرٹ پر منطقی انجام تک پہنچایا جائے گا۔

ایس پی صدر انعم شیخ نے کہا ہے کہ خواتین اور بچوں کے خلاف تشدد، زیادتی یا ہراسانی کے واقعات ناقابلِ برداشت ہیں اور ایسے جرائم میں ملوث افراد کے خلاف قانون کے مطابق سخت کارروائی عمل میں لائی جائے گی۔