جھٹہ ہتھیال کی طالبات کا ایم پی اے کے رویے کے خلاف احتجاج، وزیراعلیٰ پنجاب سے فوری نوٹس کی اپیل

نامہ نگار
راولپنڈی: تھانہ روات کی حدود میں قائم گورنمنٹ ایسوسی ایٹ گرلز کالج جھٹہ ہتھیال کی درجنوں طالبات نے پاکستان مسلم لیگ (ن) کے راولپنڈی سے منتخب ایم پی اے، پی پی 10، چوہدری نعیم اعجاز کے مبینہ غیر مناسب اور ناروا رویے کے خلاف آئینی و قانونی طریقے سے آواز بلند کر دی ہے۔
طالبات نے کالج پرنسپل کو تحریری درخواست جمع کراتے ہوئے مؤقف اختیار کیا کہ انہیں علم ہوا ہے کہ کالج انتظامیہ ایک تقریب منعقد کرنے جا رہی ہے جس میں مذکورہ ایم پی اے کو بطور مہمانِ خصوصی مدعو کرنے کا ارادہ ہے۔ طالبات اور ان کے والدین نے ایم پی اے کی مبینہ شہرت اور سابقہ رویے کے باعث شدید تحفظات کا اظہار کیا ہے۔

درخواست کے مطابق طالبات کا کہنا ہے کہ ایم پی اے کے ہمراہ متعدد غیر متعلقہ نوجوانوں کی آمد سے گرلز کالج کا تعلیمی اور اخلاقی ماحول متاثر ہونے کا خدشہ ہے، اس لیے کسی بھی ایسی تقریب کی اجازت نہ دی جائے۔ طالبات نے یہ الزام بھی عائد کیا کہ اگر کسی تقریب میں ایم پی اے کو مدعو نہ کیا جائے تو کالج انتظامیہ کو مبینہ طور پر شدید دباؤ اور دھمکیوں کا سامنا کرنا پڑتا ہے۔
طالبات نے مطالبہ کیا کہ سیاسی جماعت کی جانب سے آئندہ پارٹی ٹکٹ کسی شریف اور باوقار شخصیت کو دیا جائے تاکہ علاقے کے مکین سکون کا سانس لے سکیں۔ ان کا یہ بھی کہنا ہے کہ موجودہ حالات کے باعث کالج کی پرنسپل بھی ادارہ چھوڑنے پر غور کر رہی ہیں، جو نہایت تشویشناک امر ہے۔
طالبات نے وزیراعلیٰ پنجاب مریم نواز سے اپیل کی ہے کہ وہ اس معاملے کا نوٹس لیتے ہوئے کالج کو مبینہ تباہی سے بچائیں اور ان کی آواز سنی جائے۔
دوسری جانب کالج انتظامیہ کی جانب سے ایم پی اے کے مبینہ غیر اخلاقی رویے سے متعلق شکایت وزیراعلیٰ پورٹل پر درج کرائی گئی، جس پر سی ایم پورٹل نے راولپنڈی پولیس کو انکوائری مارک کی۔ تاہم ذرائع کے مطابق مبینہ دباؤ کے باعث تاحال اس معاملے پر کوئی مؤثر پیش رفت سامنے نہیں آ سکی۔